Simba Yaianza Ligi Kuu Kwa Kishindo, Yaichapa Kagera Sugar 2-0 Kaitaba
KIKOSI cha Simba SC, kinachonolewa na Kocha Mkuu Steve Barker, kimeanza msimu wa 2026/27 wa Ligi Kuu Tanzania Bara kwa kishindo baada ya kuibuka na ushindi wa mabao 2-0 dhidi ya Kagera Sugar.
Simba ilipata ushindi huo muhimu ugenini katika Uwanja wa Kaitaba, mkoani Kagera, ikionyesha umakini, nidhamu na mbinu za hali ya juu katika mchezo wote na hatimaye kuondoka na pointi zote tatu.
Baada ya dakika 45 za kwanza kumalizika kwa suluhu bila bao, Simba ilirejea kipindi cha pili kwa kasi mpya. Mashambulizi ya mfululizo yalizaa matunda dakika ya 69 pale Elie Mpanzu alipovunja ukimya na kuifungia Simba bao la kwanza.
Kagera Sugar walijaribu kupambana kurejea mchezoni, lakini safu ya ulinzi ya Simba ilibaki imara. Dakika chache baadaye, Ismael Tour alihitimisha furaha ya Wanasimba kwa kufunga bao la pili kwa kichwa safi na kuihakikishia timu yake ushindi wa mabao 2-0.
Ushindi huo sio tu unampa pointi tatu muhimu Kocha Steve Barker katika mchezo wake wa kwanza wa ligi, bali pia unamwezesha mlinda mlango Djibrila Kasali Mahamado kuanza msimu kwa record nzuri ya kutokuruhusu bao (clean sheet).
Mwanzo huu mzuri unaongeza hamasa kwa Wanasimba katika safari ya kuwania ubingwa wa Ligi Kuu msimu huu, huku mashabiki wakitarajia kuona muendelezo wa kiwango hiki katika mechi zinazofuata.
