Mkosi wa Shilingi: Serengeti Boys Yamwagwa AFCON U-17 2027!
Hali ya simanzi imetanda kwa wadau wa soka nchini baada ya timu ya taifa ya vijana chini ya umri wa miaka 17, Serengeti Boys, kuondolewa kwenye ndoto za kushiriki Fainali za Mataifa ya Afrika kwa vijana (AFCON U-17) za mwaka 2027 kwa njia ya kurusha shilingi (toss of a coin).
Uamuzi huo ulitolewa na Baraza la Vyama vya Mpira wa Miguu Afrika Mashariki na Kati (CECAFA) baada ya timu hiyo kushindwa kutenganishwa na Somalia katika kila kitu kwenye kundi C la michuano ya kuwania kufuzu.
Katika michezo miwili ya kundi hilo, Serengeti Boys na Somalia zilikamilisha ratiba zikiwa na uwiano sawa kabisa:
-
Pointi: Kila timu ilikusanya pointi 4 (ushindi mmoja na sare moja).
-
Mabao ya Kufunga: Kila timu ilifunga mabao 3.
-
Mabao ya Kufungwa: Kila timu iliruhusu nyavu zake kutikiswa mara moja.
Kufuatia usawa huo wa asilimia mia moja, kanuni za CECAFA zilimlazimisha kamati ya maandalizi kutumia njia ya bahati nasibu ya kurusha shilingi ili kumpata kinara wa kundi. Bahati ilimuangukia Somalia, ambapo iliibuka mshindi na kutinga rasmi hatua ya nusu fainali sambamba na timu za Uganda, Rwanda, na Ethiopia, huku Serengeti Boys ikiaga rasmi mashindano hayo.
Hata hivyo, michuano hiyo itaendelea kutoa nafasi tatu za kufuzu moja kwa moja AFCON U-17 2027 kwa timu zitakazocheza fainali na ile itakayoshika nafasi ya tatu.
