Mose Iyobo Kutumbuiza Tamasha la Bagamoyo 2026

Akithibitisha maandalizi hayo, Kaimu Mkuu wa Chuo cha Sanaa Bagamoyo (TaSUBa), Gabriel Kiiza, ameeleza kuwa siku ya hitimisho la tamasha hilo itakuwa na burudani za kukata na shoka kutoka kwa wasanii na makundi mbalimbali, akiwamo Mose Iyobo pamoja na mwanamuziki nguli Vitali Maembe.

“Tutakuwa na wasanii wengi watakaotumbuiza siku ya mwisho ya tamasha, wakiwamo Mose Iyobo na Vitali Maembe,” alisema Kiiza.

Mose Iyobo, ambaye amepata umaarufu mkubwa kupitia uchezaji wake wa dansi akiwa sehemu ya timu ya burudani ya mwanamuziki Diamond Platnumz, anatarajiwa kupanda jukwaani akiwa na kundi lake la Iyobo’s Family ili kutoa burudani ya kiwango cha juu.

Mbali na Mose Iyobo na Vitali Maembe, jukwaa hilo litapambwa na wasanii wengine wa kimataifa na wa ndani, akiwemo:

• Gifted Muneka (kutoka Zambia)

• Ras Gwandumi & Bongo Roots

• Sauti Marley and The Band

• Siza Segere Stars

• Watupamawe

Tamasha hili la siku nne, lililoanza Oktoba 28, 2026, linahitimishwa Oktoba 31 kwa kuonyesha utajiri wa sanaa ikiwemo muziki wa mubashara, ngoma za asili, sarakasi, na maigizo.