Wayne Rooney kujiua
Habari za michezo

Wayne Rooney Afichua Siri Nzito: “Nilitaka Kujiua Nikiwa Kileleni Manchester United”

Vardo November 18, 2026 12:26 pm

LONDON, England – Nahodha wa zamani wa timu ya taifa ya England na gwiji wa klabu ya Manchester United, Wayne Rooney, amefichua siri nzito kuhusu maisha yake ya nyuma, akikiri kuwa aliwahi kufikia hatua ya kufikiria kujiua kipindi akiwa katika kilele cha mafanikio yake kisoka.

Rooney, ambaye alijiunga na Manchester United akitokea Everton mwaka 2004, ameeleza kuwa licha ya kuonekana shujaa uwanjani, alikuwa akipitia vita kali ya kisaikolojia nje ya uwanja iliyomsukuma katika matumizi ya pombe kupita kiasi na kujitenga na jamii.

Ulevi wa Kujifungia Ndani kwa Siku Mbili

Akizungumza na mtangazaji Gabby Logan kupitia podikasti ya Life at the Midpoint, mshambuliaji huyo wa zamani mwenye umri wa miaka 41 alieleza jinsi alivyokuwa akijifungia nyumbani na kunywa pombe mfululizo bila kutoka nje.

“Nilipokuwa nikinywa pombe, nilikuwa najifungia nyumbani kwa siku mbili mfululizo na kunywa tu. Hicho ndicho kipindi ambacho ningesema kilikuwa kigumu zaidi maishani mwangu,” alisema Rooney.

Aliongeza kuwa alipoteza kabisa hamu ya kukutana na watu mitaani au hata kwenda madukani, na alijihisi salama pekee pale alipokuwa akicheza mpira uwanjani.

“Nilifika mahali nikawa nawaza kujiua. Sikutaka kuwa karibu na mtu yeyote. Nilikuwa najisikia vizuri kila nilipokuwa kwenye uwanja wa mpira, lakini mambo mengine yote nje ya hapo yalikuwa magumu sana kwangu,” alifafanua.

Msaada wa Mkewe Coleen na Tiba ya Kisaikolojia

Kwa mujibu wa Rooney, hali hiyo ilimtesa zaidi kwa sababu ilitokea wakati ambao kwa nje kila kitu kilionekana kwenda sawa—alikuwa amefunga ndoa, amepata mtoto wake wa kwanza (Kai, ambaye sasa ana miaka 17), na alikuwa akifanya makubwa Old Trafford.

Hata hivyo, hofu ya kuonekana “dhaifu” kama mwanaume ilimfanya afiche maumivu yake kwa muda mrefu kabla ya kuamua kuzungumza na mkewe, Coleen, pamoja na mama yake, hatua iliyompelekea kutafuta msaada wa mtaalamu wa saikolojia.

“Coleen alinisaidia sana. Angeweza kuondoka kwa sababu hali ilikuwa mbaya kiasi hicho, lakini aliamua kubaki nami na kunisaidia kuvuka kipindi hicho,” alikiri Rooney kwa hisia.

Rekodi Zake Manchester United na England

Licha ya changamoto hizo za kimaisha, Wayne Rooney aliandika historia isiyofutika katika soka la England kabla ya kurejea Everton mwaka 2017:

  • Manchester United: Alidumu kwa miaka 13, akifunga mabao 253 katika mechi 559 na kuwa mfungaji bora wa muda wote wa klabu hiyo.

  • Mataji: Alitwaa mataji matano (5) ya Ligi Kuu England (EPL), Ligi ya Mabingwa Ulaya (UEFA), Europa Ligi, Kombe la FA na mataji matatu (3) ya Kombe la Ligi.

  • Timu ya Taifa (England): Aliichezea mechi 120 na kufunga mabao 53

Taifa Stars vs Nigeria (0-0): Matokeo na Msimamo Kufuzu AFCON 2027 United Kumaliza na Pointi Ngapi EPL?