Pigo Simba SC: Nathaniel Chilambo Nje Miezi Miwili kwa Majeraha
Klabu ya Simba SC imepata pigo kubwa kuelekea michezo yake migumu ya ligi na kimataifa baada ya beki wake wa pembeni, Nathaniel Chilambo, kuthibitishwa kuwa atakuwa nje ya uwanja kwa kipindi cha miezi miwili kutokana na majeraha aliyoyapata akiwa kwenye majukumu ya timu ya taifa.
Akizungumza na waandishi wa habari kuhusu hali ya kikosi hicho, Meneja wa Idara ya Habari na Mawasiliano wa Simba, Ahmed Ally, amebainisha kuwa ripoti ya madaktari inaonyesha mchezaji huyo atakosa michezo yote ya mwezi Novemba na Desemba mwaka huu.
Kukosekana kwake kunamaanisha hatakuwa sehemu ya kikosi kitakachoshuka dimbani leo, Novemba 21, kuikabili JKT Tanzania katika mchezo wa Ligi Kuu, na pia atakosa pambano muhimu la Ligi ya Mabingwa Afrika (CAF Champions League) dhidi ya miamba ya Afrika Kusini, Orlando Pirates.
Hali ya Jeraha na Matibabu
Kwa mujibu wa Ahmed Ally, vipimo vya kitabibu vimebaini kuwa Nathaniel Chilambo amepata majeraha kwenye misuli ya kidole gumba. Tayari ameanza programu maalumu ya matibabu chini ya uangalizi wa karibu wa jopo la madaktari wa Msimbazi.
“Kwa sasa madaktari wameshauri aendelee na matibabu ya kawaida ili kuangalia namna jeraha linavyopona, lakini kama hali itakuwa tofauti, kuna uwezekano wa kufanyiwa matibabu zaidi yanayoweza kuhusisha upasuaji,” amefafanua Ahmed Ally.
Nyota Wengine Warejea Kambini
Katika hatua nyingine, kambi ya Wekundu wa Msimbazi imepata ahueni baada ya wachezaji wengine waliokuwa kwenye majukumu ya timu za taifa kurejea salama na kujiunga na wenzao kwa ajili ya maandalizi ya mchezo wa leo.
Ahmed amethibitisha kuwa beki Anthony Mligo amerejea kambini akiwa fiti kwa asilimia mia moja na tayari ameshiriki mazoezi ya mwisho na kikosi hicho, hivyo kubaki kuwa chaguo kwa benchi la ufundi wakati Chilambo akiendelea kuuguza jeraha lake.