Azam FC

Kisa Singida BS, Azam Yahaha Kwa Kitambala

Vardo July 8, 2026 8:19 pm

AZAM inahaha kumrudisha kundini mshambuliaji wake, Jephte Kitambala ambaye amebakiza hatua chache kumalizana na Singida Black Stars iliyomchukua kwa jeuri ya fedha.

Iko hivi; awali Azam ilikuwa kama haitaki kumbakisha Kitambala, ikiona kama jamaa hatoshi kwenye hesabu zao za msimu ujao lakini dakika 90 tu zikabadili akili zao.

Kiwango alichoonyesha Kitambala kwenye mchezo wa fainali ya Kombe la Shirikisho la CRDB dhidi ya Simba ndio kimebadilisha upepo huo, mabosi wa klabu hiyo wakiona Mkongomani huyo bado ana nafasi.

Ripoti ya kocha Florent Ibenge imeonyesha kumuhitaji zaidi Jean-Jacques Ngita kuendelea kubaki Azam, lakini matajiri wa klabu hiyo wanaona Kitambala ana kitu kikubwa akistahili kukitumikia kikosi hicho.

Wakati Azam wakibishana kwa hoja, Singida haikusubiri, ikashusha ofa kubwa kwa mshambuliaji huyo na uongozi wake ukakubali kila kitu na sasa dili lipo hatua za mwisho kumalizika.

Singida imeweka pesa ndefu kwa Kitambala ikimpa mkataba wenye thamani ya Dola 200,000 (Sh 525 milioni) kwa mkataba wa miaka miwili.

“Tutamalizana na Singida kwani wametupa ofa nzuri, kuna uwezekano mkubwa sana Kitambala atakwenda huko, jambo zuri ni kwamba mkataba wake na Azam umemalizika, tunawashukuru,” alisema bosi anayemsimamia Kitambala.

“Azam tumeona wanabishana, viongozi wanamtaka Kitambala lakini shida inaonekana ipo kwa kocha (Ibenge) ameonyesha anataka kubaki na Ngita, sasa wanakuja viongozi wanasema tuache ofa ya Singida, hiyo itakuwa ngumu.”

Msimu uliomalizika, Kitambala amefanikiwa kufunga mabao saba kwenye Ligi Kuu Bara, akiwa na asisti moja, ni mchezaji wa tatu kwa ufungaji ndani ya Azam nyuma ya Feisal Salum ‘Fei Toto’ aliyemaliza na mabao 15 na Iddi Seleman ‘Nado’ mwenye mabao nane.

Uamuzi wa Singida kumuhitaji Kitambala unatajwa ni kama kujiandaa na maisha ya msimu ujao bila ya kinara wa ufungaji katika Ligi Kuu ya NBC, Mosi Nduwumwe ambaye anaonekana kuhitajika na klabu kongwe za Yanga na Simba kutokana na kiwango bora cha ufungaji alichoonesha akiingia dirisha la Januari 2026 na kutupia mabao 17.