Habari za michezo

Chipukizi Yaanza Vibaya Ligi Kuu Zanzibar: Mani Gamera Afunguka Sababu

Vardo September 8, 2026 10:52 am

TIMU ya Chipukizi imeingia kwenye mwanzo mgumu wa msimu wa 2026-2027 wa Ligi Kuu Zanzibar baada ya kuvuna pointi moja pekee katika michezo mitatu ya kwanza, ikikumbana na vipigo viwili na sare moja.

Katika mechi hizo, safu ya ulinzi ya Chipukizi imeruhusu jumla ya mabao matano—ikichangiwa zaidi na kichapo cha mabao 4-1 dhidi ya Uhamiaji, pamoja na kipigo cha 1-0 mbele ya JKU. Matokeo pekee ya afadhali kwao hadi sasa ni sare ya 0-0 dhidi ya Black Sailors.

Katika mchezo wao wa hivi karibuni uliochezwa Septemba 6, 2026 dhidi ya majirani zao JKU, Chipukizi ilionyesha kiwango kilichoboreshwa. Hata hivyo, kikosi hicho kilishindwa kuhimili presha ya dakika za mwisho na kuruhusu bao la ushindi la JKU lililofungwa na Tarik Mkonga mnamo dakika ya 83.

Akizungumzia mwenendo huo, Kocha Mkuu wa Chipukizi, Suleiman Mohamed ‘Mani Gamera’, alisema mchezo wao dhidi ya JKU haukuwa mbaya kwani wachezaji walitekeleza Mbinu kwa kiasi kikubwa.

Alifafanua kuwa JKU ni timu iliyokuwa kwenye mbio za ubingwa msimu uliopita na ina wachezaji wazoefu, tofauti na kikosi chake kinachoendelea kujenga muunganiko mpya.

“Chipukizi haikufanya vizuri msimu uliopita, hivyo tulijiandaa kwa kusajili wachezaji wengi mpya. Muunganiko wa timu bado haujakaa sawa, lakini nawapongeza wachezaji kwa kupambana. Wamecheza kwa maelekezo na hawakutoka nje ya mfumo,” alisema Mani Gamera.

Kocha huyo ameongeza kuwa mabadiliko chanya yanaonekana na anajivunia nidhamu ya mchezo waliyoonyesha, akisisitiza kuwa Chipukizi haitakuwa timu ya kuruhusu mabao mengi tena kama ilivyotokea dhidi ya Uhamiaji.

Kwa sasa, Chipukizi inajiandaa na mchezo wake wa nne Jumatano dhidi ya Kipanga kwenye Uwanja wa Mao B, Unguja. Huu utakuwa mchezo wao wa mwisho ugenini kabla ya kurejea kwenye uwanja wao wa nyumbani kisiwani Pemba.