Mngqithi Aweka Presha Yanga: “Sitaki Robo Fainali, Nataka Ubingwa Afrika!”
DAR ES SALAAM, Tanzania – Kocha Mkuu wa Yanga SC, Manqoba Mngqithi, amejiweka kwenye presha kubwa kuelekea kampeni za Ligi ya Mabingwa Barani Afrika (CAF Champions League) baada ya kuweka wazi kuwa malengo yake si kufika robo fainali pekee, bali kutwaa taji la Afrika msimu huu.
Akizungumza kuhusu mtazamo wa kocha huyo, Afisa Habari na Mawasiliano wa Yanga, Ali Kamwe, ameeleza kuwa Mngqithi amewathibitishia viongozi wa klabu hiyo kuwa ubora na kina cha kikosi alichonacho kina uwezo wa kutinga fainali na kubeba ndoo.
Tofauti ya Malengo: Viongozi vs Kocha
Kwa mujibu wa Kamwe, uongozi wa Yanga ulijiwekea lengo la kuishia hatua ya robo fainali, lakini Mngqithi ana mtazamo tofauti na mkubwa zaidi kulingana na uzoefu wake wa mashindano ya kimataifa.
“Kocha ametuambia viongozi: ‘Sisi malengo yetu ni robo fainali? Tulieni.’ Ameshaangalia ubora wa timu yake na kuona ina uwezo wa kucheza fainali ya Ligi ya Mabingwa Afrika. Huyu si kocha wa kuunga-unga, ni kocha kweli mwenye uzoefu mkubwa,” alisema Kamwe.
Kamwe aliongeza kuwa Mngqithi amewataka viongozi kuendelea na mipango yao ya klabu wakati yeye akipambana kutimiza ndoto ya kutwaa taji hilo kubwa barani Afrika.
“Kaangalia kikosi akasema, ‘Viongozi bakini na malengo yenu, mimi nina malengo yangu.’ Tumetulia, tusubiri yeye Jumamosi anawapelekea moto Gaborone United, baadaye kuvuka hatua nyingine hadi kucheza fainali na kuvaa medali ya CAF na kombe mkononi,” alisisitiza Kamwe.
Wito kwa Mashabiki Chamazi
Kufuatia kauli hiyo iliyoongeza presha na matarajio makubwa kwa klabu hiyo, Kamwe amewataka mashabiki wa Yanga kujitokeza kwa wingi kumpa ushirikiano kocha huyo na wachezaji ili kufanikisha azma hiyo.
“Sisi tumuachie Kocha Manqoba majukumu yake ya kuwapelekea moto wapinzani wetu. Kazi kwetu mashabiki ni kujitokeza kwa wingi siku ya Jumamosi katika Uwanja wa Azam Complex,” alisema.
Yanga inaendelea na maandalizi ya mchezo wa marudiano dhidi ya Gaborone United ya Botswana utakaopigwa Jumamosi kwenye Uwanja wa Azam Complex, Chamazi. Katika mchezo wa kwanza uliochezwa nchini Botswana, timu hizo zilirejea nyumbani zikiwa na sare ya 1-1, hivyo Yanga inahitaji ushindi wa aina yoyote ili kusonga mbele na kuendeleza ndoto ya Mngqithi.
