Taifa Stars Yaangukia Pua Nyumbani Dhidi ya Guinea-Bissau Kufuzu AFCON 2027

TIMU ya Taifa ya Tanzania, Taifa Stars, imeanza vibaya mbio za kufuzu Fainali za Kombe la Mataifa Afrika (AFCON 2027) baada ya kukubali kichapo cha mabao 2-0 nyumbani kutoka kwa Guinea-Bissau.

Mchezo huo wa Kundi L uliopigwa leo Ijumaa kwenye Uwanja wa New Amaan Complex, Zanzibar, ulishuhudia wageni Guinea-Bissau wakitawala nafasi zao na kuondoka na alama zote tatu.

Makosa ya Ulinzi Yagharimu Taifa Stars Kipindi cha Kwanza

Guinea-Bissau walipata bao la uongozi mnamo dakika ya 33 kupitia kwa mshambuliaji wao Franculino Djú. Djú aliahirisha ndoto za Stars kwa kuachia shuti kali la mbali lililomshinda kipa Zuber Foba, kufuatia uzembe wa mabeki Bakari Mwamnyeto na Ibrahim Bacca walioshindwa kuondoa mpira wa hatari uliotengenezwa na Norberto Betuncal ‘Beto’.

Kabla ya bao hilo, Taifa Stars ilipata nafasi ya dhahabu dakika ya 14 pale Charles M’mombwa alipomtengea pasi safi Simon Msuva karibu na lango la wageni, lakini shuti la Msuva lilipaa juu ya lango. Guinea-Bissau walienda mapumziko wakiwa mbele kwa bao 1-0.

Mabadiliko ya Gamondi Yagonga Mwamba Kipindi cha Pili

Kipindi cha pili kilianza kwa kasi ambapo Guinea-Bissau walimfanya mabadiliko dakika ya 55 kwa kumuingiza Adramane Cassama mahali pa Iano Simão. Mabadiliko hayo yalilipa dakika tatu baadaye (dakika ya 58), pale nahodha Mama Balde alipopachika bao la pili akimalizia pasi safi ya Euciodálcio Gomes.

Kocha Mkuu wa Taifa Stars, Miguel Gamondi, alijaribu kubadili upepo wa mchezo dakika ya 62 kwa kuwatoa Himid Mao, Charles M’mombwa, na Seleman Mwalimu na kuwaingiza Mudathir Yahya, Alphonce Mabula pamoja na Tarryn Allarakhia. Hata hivyo, mabadiliko hayo hayakuzaa matunda hadi mwamuzi kutoka Zimbabwe, Brighton Chimene, alipopuliza filimbi ya mwisho.

Ratiba Inayofuata

Baada ya matokeo haya, Taifa Stars itasafiri hadi nchini Morocco kukabili Madagascar katika mchezo wao wa pili utakaopigwa Septemba 29, 2026.

Licha ya kufanya vibaya katika mchezo huu, Tanzania tayari ina tiketi ya kushiriki fainali hizo za AFCON 2027 kama miongoni mwa nchi wenyeji pamoja na Kenya na Uganda. Fainali hizo zitatarajiwa kurindima kuanzia Juni 19 hadi Julai 19, 2026.