Msimu Mgumu kwa Vinicius Junior Real Madrid: Thamani Yake Yaporomoka!
MADRID, HISPANIA — Achana na kadi nyekundu aliyolimwa Vinicius Junior hivi karibuni dhidi ya Villarreal baada ya tukio la kumvuta nywele kiungo Nathan Saliba, nyota huyo wa kimataifa wa Brazil anakabiliwa na kipindi kigumu sana ndani ya klabu ya Real Madrid. Kiwango chake kimeshuka kwa kiasi kikubwa, huku thamani yake sokoni ikiporomoka kwa Pauni milioni 70 ndani ya miezi 18 tu.
Hapo awali, mshambuliaji huyo aliyekuwa miongoni mwa wachezaji waliopigiwa chapuo kubwa kushinda tuzo ya Ballon d’Or mwaka 2024, alivunja rekodi ya thamani kwa kufikia Pauni milioni 200 baada ya kuwa nguzo muhimu katika mafanikio ya Real Madrid, yakiwemo mataji ya Ligi ya Mabingwa Ulaya. Hata hivyo, tangu wakati huo, mwenendo wake uwanjani umekuwa wa kusuasua.
Takwimu Duni na Ushindani na Kylian Mbappe
Katika mechi saba za Ligi Kuu Hispania (LaLiga) msimu huu, Vinicius amefunga bao moja na kutoa pasi tatu za mabao (assists). Kiwango chake hafifu, ukijumuisha mchezo mbaya dhidi ya Atletico Madrid, kimezua wimbi kubwa la ukosoaji kutoka kwa mashabiki na wachambuzi wa soka.
Kuwasili kwa Kylian Mbappe kumeongeza ushindani mkubwa katika safu ya ushambuliaji, jambo lililomfanya Vinicius kupoteza hadhi yake kama nyota mkuu (main man) wa kikosi hicho. Ingawa Real Madrid iliwahi kufikiria uwezekano wa kumuuza—huku Arsenal ikiwa miongoni mwa timu zilizokuwa zikimfuatilia kwa karibu—pande zote mbili zilikuja kufikia makubaliano ya mkataba mpya utakaomweka Bernabeu hadi mwaka 2032.
Licha ya usalama wa mkataba huo mpya, kiwango chake hakijaimarika. Tathmini mpya ya mtandao wa usajili wa Transfermarkt sasa inampa thamani ya Pauni milioni 130, likiwa ni eneo lake la chini zaidi kiuchumi katika miaka mitatu iliyopita.
Mratibu wa thamani za soko wa Transfermarkt, Tobias Blaseio, anasema wazi kuwa mchezaji huyo yupo mbali na ubora wake wa zamani.
“Kwa upande wa uchezaji, amekosa ile nguvu na ubunifu aliokuwa nao awali. Ukosoaji umeenea, na hata mkataba mpya haujaonekana kubadili mwenendo huu,” anasema Blaseio.
Je, Arsenal Ndiyo Itakayomwokoa?
Wakati viongozi wa Real Madrid wakiendelea kuamini kuwa Vinicius anaweza kurejea kwenye makali yake, mazingira ya klabu hiyo yanatoa presha kubwa kwa wachezaji wanaoshindwa kufikia matarajio ya mashabiki. Zaidi ya hayo, mahitaji yake makubwa ya mshahara yanapunguza idadi ya klabu zinazoweza kumudu huduma yake.
Hata hivyo, Arsenal bado inaonekana kuwa moja ya machaguo makuu endapo Los Blancos watafikia uamuzi mgumu wa kumuuza katika dirisha lijalo la usajili. Kwa sasa, macho na masikio ya uongozi wa Madrid yako kwa Vinicius, wakisubiri kuona kama atajibu mapigo na kuthibitisha tena kwa nini aliwahi kutajwa kuwa miongoni mwa wachezaji hatari zaidi duniani.
