Simba SC Yataja Siri ya Kuwanyuka 15 de Agost
MSHAMBULIAJI hatari wa Simba SC, Ibrahim Doumbia, amefichua kuwa maandalizi thabiti ya kikosi hicho ndiyo yaliyowezesha ushindi mnono dhidi ya 15 de Agosto kwenye mchezo wa Ligi ya Mabingwa Afrika. Amesisitiza kuwa ushindi huo mkubwa unawapa utulivu mkubwa kuelekea mchezo wa marudiano.
Doumbia, aliyefunga mabao mawili katika pambano hilo lililochezwa kwenye Uwanja wa Uhuru jijini Dar es Salaam, amesema kuwa Wekundu wa Msimbazi waliingia uwanjani wakiwa na lengo moja tu: kupata ushindi wa mabao mengi ili kujihakikishia usalama mapema.
Akizungumza mara baada ya mchezo kumalizika, nyota huyo aliwapongeza wachezaji wenzake na benchi la ufundi kwa kazi kubwa waliyoifanya uwanjani.
“Tunamshukuru Mungu kwa kutupatia ushindi. Tulijiandaa vizuri sana kwa mchezo huu na sasa tunarejea nyumbani tukiwa na tabasamu, huku tukianza maandalizi ya mchezo unaofuata,” amesema Doumbia.
Aidha, aliongeza kuwa wanatambua ugumu wa michuano ya Ligi ya Mabingwa Afrika na kwamba hakuna mchezo wa mteremko, ndiyo maana walikubaliana kupambana kwa nguvu zote tangu dakika ya kwanza hadi ya mwisho.
“Hongera kwa timu, kocha, na wachezaji wote. Tunajua wazi hakuna mechi rahisi Afrika, lakini tulijiambia lazima tushinde na kufunga mabao mengi iwezekanavyo ili tuweze kujiandaa kwa utulivu mkubwa kuelekea mchezo wa marudiano,” aliongeza.
Kwa sasa, kikosi cha Simba kinatua rasmi kwenye maandalizi ya mchezo ujao, kikiwa na dhamira ya kuendeleza wimbi la ushindi na kusonga mbele zaidi katika michuano hiyo ya kimataifa.
