Steve Barker Ampa Maagizo Mazito Libasse Gueye Simba

KOCHA Mkuu wa Simba, Steve Barker, amemtaka kiungo mshambuliaji wa timu hiyo, Libasse Gueye, kuendelea kutumia uwezo wake wa kupenya safu za ulinzi za wapinzani na kutengeneza nafasi za mabao, huku akisisitiza umuhimu wa kuboresha umaliziaji ili kuongeza ufanisi wa timu hiyo katika kufunga.

Barker amesema kuwa Gueye amekuwa akionyesha uwezo mkubwa wa kuingia katika maeneo hatari, hasa katikati ya safu za ulinzi na kiungo za wapinzani, jambo ambalo linaipa Simba nafasi kubwa ya kutengeneza mashambulizi yenye madhara makubwa.

Hata hivyo, kocha huyo alisisitiza kuwa hatua inayofuata ni kuhakikisha kikosi cha Simba kinakuwa na mpango madhubuti wa kutumia vizuri nafasi zinazotengenezwa na Gueye ili kuongeza idadi ya mabao, badala ya kuishia kupoteza fursa hizo za wazi.

“Libasse ana uwezo wa kuwapita wapinzani na kututengenezea nafasi za mabao. Sasa tunachohitaji ni kuwa na mpango bora zaidi wa kutumia nafasi hizo anapofanikiwa kupenya, ili tufunge mabao mengi zaidi kutokana na hali kama hizo,” amesema Barker.

Mbinu Mpya ya Kubadilishana Nafasi Uwanjani

Katika hatua nyingine, kocha huyo alizungumzia mbinu ya wachezaji kubadilishana nafasi uwanjani, akiwataja Libasse Gueye, Anicet Oura na Elie Mpanzu kuwa miongoni mwa wachezaji wenye uwezo mkubwa wa kutekeleza mfumo huo kwa ufanisi.

Amesema mbinu hiyo ni sehemu ya maandalizi ya mazoezi ya Simba yanayolenga kuwajengea wachezaji uwezo wa kucheza katika maeneo tofauti ya uwanja. Hatua hii inalenga kuongeza machaguo mapya ya kushambulia na kufanya mchezo wa timu hiyo kuwa mgumu kutabirika kwa wapinzani wao.

Barker alimalizia kwa kueleza kuwa uhuru huu unawapa wachezaji nafasi ya kutumia uwezo wao binafsi kulingana na mazingira ya mchezo, huku ukiifanya Simba kuwa na mashambulizi yenye mabadiliko ya kasi na tishio kubwa langoni mwa wapinzani.