Yanga Yamuwekea Mtego Simba, Manqoba Ataja Pointi 10 Ligi ya Mabingwa!

Kocha Mkuu wa Yanga, Manqoba Mngqithi, ameweka wazi mpango mkakati wa timu hiyo katika michuano ya kimataifa, akisisitiza kuwa wanatafuta angalau pointi 10 katika hatua ya makundi ya Ligi ya Mabingwa Afrika ili kujihakikishia nafasi ya kutinga robo fainali na kuendelea na ndoto zao za ubingwa.

Akizungumzia mikakati ya kikosi chake, Mngqithi alisema kuwa Yanga inaingia kwenye hatua hii ikiwa na ari kubwa ya kupambana, akionyesha imani kuwa kikosi chake kina uwezo wa kufikia lengo hilo kupitia matokeo mazuri kwenye michezo ya nyumbani na ugenini.

Tofauti na hatua ya mtoano ambapo kupoteza mchezo mmoja kunaweza kuwa tiketi ya kuondolewa, Mngqithi alieleza kuwa hatua ya makundi inatoa nafasi ya kujipanga na kurekebisha makosa.

“Nataka kuipa Ligi ya Mabingwa Afrika nafasi ya kutosha na kupambana kwa nguvu zetu zote. Sasa kwa kuwa tumefanikiwa kufika hatua ya makundi, hali si ngumu kama ilivyokuwa hatua za awali ambapo ukipoteza mchezo mmoja tu unaweza kutolewa,” alisema Mngqithi.

Kocha huyo alisisitiza kuwa ushindi katika uwanja wa nyumbani utakuwa msingi mkuu wa kufikisha hesabu zao za pointi, huku wakipanga kupigania ushindi hata katika michezo ya ugenini kutegemea na mazingira ya wapinzani watakaokutana nao.

Hata hivyo, alihitimisha kwa kusema kuwa mafanikio hayo yanahitaji maandalizi ya kina, nidhamu ya wachezaji uwanjani, na umakini mkubwa katika kutumia nafasi za mabao ili kuandika historia mpya barani Afrika.