Honour Janza Aspanishwa na Miundombinu ya Simba SC, Aahidi Mafanikio Mo Arena

Mkurugenzi mpya wa Ufundi wa klabu ya Simba SC, Honour Janza, ameeleza kuvutiwa kwake na uwekezaji mkubwa wa miundombinu unaofanywa na klabu hiyo, akibainisha kuwa mazingira aliyoyakuta katika kituo cha mazoezi cha Mo Arena yanatoa msingi thabiti wa mafanikio ya baadaye.

Janza ametoa kauli hiyo mara baada ya kutembelea na kushuhudia mazoezi ya kikosi cha Wekundu wa Msimbazi, kinachoendelea kujiandaa na mechi zijazo za Ligi Kuu ya NBC pamoja na hatua ya makundi ya Ligi ya Mabingwa Afrika (CAFCL).

Heshima Kubwa Kuitumikia Simba SC

Akizungumza baada ya ziara hiyo, kocha huyo mwenye uzoefu mkubwa ameeleza kuwa ni heshima ya kipekee kwake kupewa dhamana hiyo ndani ya klabu yenye historia na ukubwa wa kipekee barani Afrika.

“Ni heshima kubwa kuteuliwa kuwa Mkurugenzi wa Ufundi wa Simba SC. Hii ni klabu yenye historia kubwa Afrika na Tanzania, hivyo ninapaswa kuichukulia nafasi hii kwa heshima ya juu. Nawashukuru viongozi wa bodi na uongozi mzima kwa kuniamini na kunipa nafasi hii,” amesema Janza.

Kituo cha Mo Arena na Utayari wa Kikosi

Kuhusu miundombinu ya klabu hiyo, Janza alisifu viwanja na mazingira ya Mo Arena akisema kuwa na kituo cha michezo cha kiwango hicho ni ndoto ya kila klabu inayotaka kupiga hatua kubwa katika soka la kisasa.

Pia aliongeza kuwa amevutiwa na nidhamu pamoja na utayari aliuona kutoka kwa wachezaji na benchi la ufundi chini ya kocha mkuu.

“Nimeona wachezaji wana kiu kubwa ya mafanikio. Pamoja na kutoka kwenye mapumziko, namna walivyojituma mazoezini kimenipa matumaini makubwa. Kila mchezaji anaonyesha weledi na viwango vya juu, jambo ambalo ni muhimu katika kutimiza malengo ya klabu,” alihitimisha.