Habibu Kinyogoli Afariki Dunia: Pigo Kubwa Mchezo wa Ngumi Tanzania
Tasnia ya mchezo wa ngumi nchini Tanzania imepata pigo kubwa kufuatia kifo cha kocha mkongwe na bondia mstaafu, Mzee Habibu Kinyogoli.
Kinyogoli amefariki dunia usiku wa kuamkia leo Jumanne, Novemba 17, 2026, baada ya kupata ajali mbaya ya gari katika eneo la Tabata Mataa, jijini Dar es Salaam. Hadi mauti yanamkuta, gwiji huyo alikuwa akihudumu kama kocha wa bondia wa ngumi za kulipwa nchini, Ibra Classic.
Kwa mujibu wa taarifa za awali, taratibu na ratiba kamili ya mazishi ya marehemu bado hazijatolewa rasmi na familia yake.
Kauli ya Mwisho ya Mzee Kinyogoli Yatima
Kifo cha Mzee Kinyogoli kimekuja miezi mitatu tu tangu alipotoa kauli nzito kuhusu mapenzi yake kwenye mchezo wa masumbwi, akisisitiza kuwa hataacha kufundisha hadi kifo kitakapomchukua.
Mwezi Agosti mwaka huu, Kinyogoli — ambaye amefariki akiwa na umri wa miaka 78 — alifanya mahojiano maalum na Mwananchi Digital na kueleza ndoto yake ya kuendelea kuwanoa vijana wengi ili waje kuwa mabondia wakubwa watakaoipeperusha vyema bendera ya Tanzania kimataifa.
“Sina mpango wa kuacha kufundisha ngumi kwa sababu ya umri, labda niugue maradhi yatakayonifanya nishindwe kufanya kazi yangu au umauti utakaponikuta,” alinukuliwa akisema enzi za uhai wake.
Marehemu aliongeza kuwa michezo ndiyo iliyokuwa siri kubwa ya afya yake imara licha ya umri mkubwa:
“Mimi sina kazi nyingine ya kufanya zaidi ya hii na kwa hakika naifurahia. Niache ngumi ili nifanye nini ilhali vijana bado wanahitaji mafunzo yangu? Kwanza michezo ni afya; hivi unavyoniona ni kwa sababu ya kushiriki mazoezi, kama ningekuwa sijishughulishi afya yangu ingekuwa imetetereka.”