CHAMA ATESA MASHUJAA, SIMBA YAPUNGUZA PENGO KWA YANGA

KIUNGO mshambuliaji wa Simba SC, Clatous Chama ameendelea kuthibitisha ubora wake baada ya kuiongoza timu hiyo kupata ushindi wa mabao 3-0 dhidi ya Mashujaa FC katika mchezo wa Ligi Kuu Tanzania Bara uliopigwa kwenye Uwanja wa Lake Tanganyika mjini Kigoma.

Ushindi huo umeongeza morali kwa Simba katika harakati zao za kusaka ubingwa wa ligi msimu huu.

Chama alikuwa mchezaji bora wa mchezo huo baada ya kufunga mabao mawili yaliyoipa Simba alama tatu muhimu ugenini.

Kiungo huyo alianza kuonyesha makali yake mapema dakika ya tano alipofunga bao la kwanza kupitia mpira wa kona uliowachanganya mabeki wa Mashujaa FC na kumwacha akitumia nafasi hiyo kuiandikia Simba bao la kuongoza.

Baada ya bao hilo, Mashujaa FC walijaribu kurejea mchezoni kwa kutumia faida ya uwanja wa nyumbani huku wakisukumwa na mashabiki wao.

Hata hivyo, Simba walionekana kuwa na utulivu mkubwa katika umiliki wa mpira na kupanga mashambulizi yao kwa umakini mkubwa kupitia safu ya kiungo iliyokuwa ikiongozwa na Chama pamoja na Neo Maema.

Katika kipindi cha kwanza, Simba walikwenda mapumziko wakiwa mbele kwa bao 1-0 huku wakionyesha kiwango kizuri dhidi ya Mashujaa FC ambao walikuwa na rekodi nzuri kwenye dimba lao la nyumbani kabla ya mchezo huo.

Wenyeji hao walionekana kupambana kusaka bao la kusawazisha lakini walishindwa kupenya safu ya ulinzi ya Simba iliyokuwa imara muda wote wa mchezo.

Bao la pili la Simba lilifungwa dakika ya 69 baada ya Neo Maema kufanya kazi nzuri ya kupenyeza mpira uliomkuta Chama, ambaye hakusita kuutumbukiza wavuni na kuandika bao lake la pili katika mchezo huo.

Ushirikiano wa Maema na Chama uliendelea kuwa mwiba mkubwa kwa Mashujaa FC ambao walishindwa kuhimili kasi ya mashambulizi ya Simba.
Dakika chache baadaye, Seleman Mwalimu aliihakikishia Simba ushindi mnono baada ya kufunga bao la tatu kufuatia pasi nzuri kutoka kwa Maema.

Bao hilo lilizima kabisa matumaini ya Mashujaa FC ya kurejea mchezoni na kuwafanya mashabiki wa Simba kushangilia ushindi muhimu walioupata ugenini.

Kabla ya mchezo huo, Mashujaa FC walikuwa na rekodi nzuri nyumbani baada ya kuzizuia timu vigogo kama Singida Black Stars na Azam FC kupata ushindi kirahisi. Hata hivyo, ubora wa Chama na wenzake umefanikiwa kuivunja rekodi hiyo.

Ushindi huo umeifanya Simba kufikisha pointi 52 kwenye msimamo wa Ligi Kuu Tanzania Bara na kuendelea kupunguza pengo dhidi ya vinara Young Africans SC wenye pointi 54, hali inayozidi kuongeza ushindani mkali wa mbio za ubingwa msimu huu.