CHAMA AIGEUZA MEI KUWA MALI YAKE SIMBA

KIUNGO wa Simba SC, Clatous Chama, ameendelea kuwafunga midomo waliobeza uamuzi wa viongozi wa klabu hiyo kumrejesha kikosini nyota huyo katika dirisha dogo la usajili akitokea Singida Black Stars.

Wakati baadhi ya mashabiki na wadau wa soka wakiponda usajili huo kwa madai kuwa Chama hakuonyesha makubwa alipokuwa Yanga SC na baadaye Singida BS, kiungo huyo sasa ameanza kuthibitisha ubora wake ndani ya kikosi cha Wekundu wa Msimbazi.

Tangu arejee Simba, Chama ameonekana kurejea katika kiwango chake bora, hasa ndani ya mwezi Mei 2026 ambapo amekuwa mmoja wa wachezaji muhimu katika harakati za timu hiyo kusaka ubingwa wa Ligi Kuu Tanzania Bara.

Nyota huyo anayefahamika kwa jina la utani la “Mwalimu” kutokana na uwezo wake mkubwa wa kusoma mchezo, kutengeneza nafasi na kuiongoza timu uwanjani, ameonyesha kiwango cha juu katika michezo mitano aliyocheza mwezi huu.

Katika kipindi hicho, Chama amehusika moja kwa moja katika mabao tisa, takwimu zinazoonyesha mchango wake mkubwa kwenye mafanikio ya Simba katika hatua muhimu ya msimu.

Alianza kuonyesha ubora wake kwenye dabi dhidi ya Young Africans SC ambapo alitoa pasi ya bao na kusaidia Simba kupata matokeo muhimu katika mchezo uliokuwa na ushindani mkubwa.

Baadaye, katika mchezo dhidi ya JKT Tanzania, Chama alifunga bao moja kabla ya kuongeza pasi nyingine ya bao dhidi ya Tanzania Prisons SC.

Ubora wake uliendelea kuonekana alipofunga mabao mawili dhidi ya Mashujaa FC, kabla ya kuhitimisha mwezi kwa kiwango cha kuvutia zaidi dhidi ya Coastal Union ambapo alifunga bao moja na kutoa pasi mbili za mabao.

Kwa ujumla, Chama amecheza mechi tano mwezi Mei, akifunga mabao matano na kutoa pasi nne za mabao (assists), rekodi iliyomfanya kuwa mmoja wa wachezaji wenye mchango mkubwa zaidi ndani ya kikosi cha Simba katika kipindi hiki cha mwisho wa msimu.

Kutokana na kiwango hicho cha moto, kiungo huyo ameibuka mchezaji bora wa mechi katika michezo yote mitano aliyocheza, jambo linalozidi kuwapa matumaini mashabiki wa Msimbazi wanaomuona kama injini ya timu kwa sasa.

Sasa macho ya mashabiki yanaelekezwa kwenye mchezo ujao dhidi ya Dodoma Jiji FC utakaochezwa Mei 24 katika Uwanja wa KMC Complex, huku wengi wakisubiri kuona kama “Mwalimu” ataendelea kuwasha moto wake na kuiongoza Simba katika mbio za ubingwa wa ligi.