VITA HAIJAISHA IBENGE AELEKEZA NGUVU KWA YANGA

KOCHA Mkuu wa Azam FC, Florent Ibenge, amesema ushindi walioupata dhidi ya Yanga katika hatua ya nusu fainali ya Kombe la Shirikisho la CRDB haujaweka mwisho wa ushindani kati ya timu hizo mbili, kwani bado wanakutana tena katika mchezo muhimu wa Ligi Kuu Tanzania Bara.

Azam FC ilifanikiwa kutinga fainali ya michuano hiyo baada ya kuibuka na ushindi wa mabao 3-2 dhidi ya Yanga katika mchezo wa kusisimua uliochezwa Uwanja wa CCM Kirumba, Mwanza.

Matokeo hayo yaliwawezesha Wanalambalamba kukata tiketi ya kucheza fainali huku Yanga wakimaliza safari yao kwenye mashindano hayo.

Ibenge amesema kikosi chake hakina muda wa kusherehekea ushindi huo kwa muda mrefu, kwani tayari kimehamishia nguvu na umakini wake kwenye mchezo ujao wa ligi dhidi ya wapinzani hao hao.

Kocha huyo raia wa DR Congo amesisitiza kuwa bado kuna kazi kubwa mbele yao, hasa ikizingatiwa umuhimu wa mchezo wa Juni 24, 2026 utakaopigwa Zanzibar, ambao unaweza kuwa na mchango mkubwa katika mbio za ubingwa wa Ligi Kuu Tanzania Bara.

Ibenge amesema jambo la msingi kwa sasa ni kuhakikisha wachezaji wake wanarejea katika hali nzuri ya kimwili na kiakili baada ya mchezo mgumu wa nusu fainali uliotumia nguvu nyingi, ili wawe tayari kwa changamoto inayofuata.

“Ushindi dhidi ya Yanga umetupa morali kubwa, lakini hilo halitoshi ikiwa hatutaendelea kuonyesha kiwango bora katika mechi zilizobaki za ligi, kila mchezo uliosalia una uzito wake katika kuamua hatima ya msimu,” amesema kocha huyo.