YANGA YAWEKA REHANI KILA KITU DHIDI YA AZAM FC

MSEMAJI wa Yanga, Ali Kamwe, amesema klabu hiyo imejipanga kupambana hadi mwisho kuhakikisha inalitetea taji la Ligi Kuu Tanzania Bara, akisisitiza kuwa hawapo tayari kumaliza msimu bila kubeba kombe lolote.

Kamwe amesema licha ya changamoto mbalimbali ambazo timu imekutana nazo katika kipindi hiki cha mwisho wa msimu, bado morali ndani ya kikosi ipo juu na kila mmoja anatambua umuhimu wa mechi zilizobaki katika mbio za ubingwa.

Ameeleza kuwa kwa sasa heshima ya klabu hiyo ipo katika kuhakikisha inabaki kileleni mwa soka la Tanzania kwa kutetea ubingwa wao wa ligi, huku akibainisha kuwa hatua iliyosalia ni ndogo lakini inahitaji umakini mkubwa kutokana na ushindani uliopo.

Yanga tayari imewasili Visiwani Zanzibar kujiandaa na mchezo muhimu dhidi ya Azam FC utakaopigwa Juni 24 katika Uwanja wa New Amaan Complex, pambano ambalo linaonekana kuwa na uzito mkubwa katika mbio za kutwaa taji la msimu huu.

Kwa mujibu wa Kamwe, kikosi hicho kinafahamu umuhimu wa mchezo huo na kimeweka nguvu zote katika maandalizi yake ili kuhakikisha kinapata matokeo yatakayokiweka kwenye nafasi nzuri ya kutimiza malengo yake.

“Msimu huu hatuwezi kutoka patupu. Mambo magumu tunayopitia hayawezi kutufanya tushindwe kutetea taji letu la ubingwa. Wachezaji wana morali kubwa na wako tayari kupambana kwa ajili ya nembo ya klabu,” amesema Kamwe.

Kauli hiyo inaonyesha dhamira ya Yanga ya kupigania ubingwa hadi dakika ya mwisho, huku mashabiki wake wakisubiri kuona kama kikosi hicho kitaweza kuvuka kizingiti cha Azam FC na kuendelea kusogea karibu zaidi na kutetea taji lao la Ligi Kuu Tanzania Bara.