YANGA HATUA ZA MWISHO VITA YA UBINGWA, BACCA ASEMA………..
BEKI wa Yanga, Ibrahim Bacca, amesema kikosi hicho bado hakina nafasi ya kupunguza kasi licha ya kujikuta katika nafasi nzuri ya kutwaa ubingwa wa Ligi Kuu Tanzania Bara, akisisitiza kuwa lengo lao ni kumaliza msimu kwa mafanikio na heshima kubwa.
Yanga imebakiza michezo miwili dhidi ya TRA United na JKT Tanzania kabla ya kufunga pazia la msimu, huku kila pointi ikiwa muhimu katika kuhakikisha wanafikia malengo waliyojiwekea.
Bacca amesema ndani ya kikosi hicho hakuna mchezaji anayefikiria kuwa kazi imekwisha, kwani wote wanaelewa umuhimu wa mechi zilizosalia na wajibu wa kuendelea kupambana hadi mwisho wa msimu.
“Ushindani uliokuwepo msimu huu unatufanya tuendelee kuwa makini katika kila mchezo. Hatuangalii ukubwa au udogo wa timu, tunachojua ni kupambana na kuhakikisha tunapata matokeo mazuri katika mechi zilizosalia,” amesema Bacca.
Ameongeza kuwa benchi la ufundi limeendelea kuwasisitiza wachezaji kudumisha nidhamu, umoja na ari ya ushindani ili kuhakikisha timu inaendelea kufanya vizuri hadi mchezo wa mwisho.
“Kwenye mpira huwezi kuanza kusherehekea mapema. Bado tuna kazi ya kufanya na tunahitaji kumaliza msimu vizuri. Kila mchezo una umuhimu wake na tunataka kuonyesha ubora wetu hadi dakika ya mwisho ya msimu,” ameongeza.
Bacca pia ameeleza kuwa mshikamano uliopo ndani ya kikosi umekuwa silaha muhimu iliyowasaidia Yanga kufanya vizuri msimu huu, huku kila mchezaji akitoa mchango wake kwa ajili ya mafanikio ya timu.
Aidha, amewapongeza mashabiki wa Yanga kwa sapoti kubwa waliyoitoa msimu mzima, akisema uwepo wao umekuwa chanzo cha hamasa na nguvu kwa wachezaji kila wanapoingia uwanjani.
Kwa sasa, Yanga imeelekeza nguvu zake zote katika mechi mbili zilizobaki, ikilenga kumaliza msimu kwa ushindi na kuendelea kuwapa furaha mashabiki wake huku wachezaji wakiahidi kupambana hadi mwisho wa safari ya ligi..
