Jbaar Dili Lakamilika Msimbazi Kwa Barker

UONGOZI wa Simba SC umefikia makubaliano ya kumsajili kiungo mshambuliaji raia wa Nigeria, Ibraheem Jabaar, kwa mkataba wa miaka miwili baada ya kukamilisha mazungumzo yaliyodumu kwa muda.

Jabaar, ambaye alikuwa akiichezea Stellenbosch FC ya Afrika Kusini, amesaini akiwa mchezaji huru baada ya kumaliza mkataba wake na klabu hiyo, hatua iliyorahisisha Simba kufanikisha usajili wake.

Taarifa kutoka ndani ya klabu zinaeleza kuwa pande zote mbili zimekubaliana kuhusu masharti ya mkataba, huku kilichobaki kikiwa ni kutangazwa rasmi kwa nyota huyo na uongozi wa Wekundu wa Msimbazi.

Inaelezwa pia kuwa kocha mkuu wa Simba, Steve Barker, alikuwa na mchango mkubwa katika kumshawishi Jabaar kujiunga na kikosi hicho, licha ya kiungo huyo kuvutiwa na klabu nyingine zilizokuwa zikihitaji huduma yake.

Usajili wa Jabaar ni sehemu ya mkakati wa Simba wa kuimarisha kikosi kuelekea msimu wa 2026/27, ambapo klabu hiyo inalenga kurejesha makali yake katika mashindano ya ndani pamoja na kufanya vizuri katika michuano ya kimataifa.

Kiungo huyo anafahamika kwa uwezo wake wa kutengeneza nafasi za mabao, kutoa pasi za mwisho zenye ubora na kuchangia upachikaji wa mabao, sifa ambazo zinaaminika kuongeza ushindani na ubora katika safu ya ushambuliaji ya Simba.

Ingawa Simba bado haijatoa tamko rasmi kuhusu usajili huo, taarifa kutoka vyanzo mbalimbali zinaeleza kuwa dili hilo limekamilika na kinachosubiriwa kwa sasa ni utambulisho rasmi wa Ibraheem Jabaar, ambaye anatarajiwa kuwa mmoja wa nyota wapya watakaovaa jezi ya Wekundu wa Msimbazi msimu ujao.