Yanga Yafanya Mapinduzi Ya Ulinzi, Mabeki Wawili Njiani
KLABU ya Yanga inaendelea na maboresho ya kikosi chake kuelekea msimu wa 2026/27, huku ikitajwa kuwa katika hatua za mwisho za kukamilisha usajili wa mabeki wawili kutoka Mashujaa FC.
Taarifa zinaeleza kuwa mabingwa hao wa Ligi Kuu Tanzania Bara wameelekeza nguvu zao kwa beki wa kati Mohammed Mussa, ambaye ameibuka kuwa chaguo lao la kwanza baada ya mazungumzo ya awali ya kumsajili Nasri Kombo wa TRA United kutofikia mafanikio.
Mussa alionyesha kiwango bora msimu uliopita, akicheza mechi 25 kati ya 30 za Ligi Kuu akiwa mhimili wa safu ya ulinzi ya Mashujaa FC. Uwezo wake wa kucheza kwa utulivu, nguvu kwenye mipira ya juu na uimara wa kujilinda umevutia benchi la ufundi la Yanga.
Hata hivyo, ili kukamilisha usajili huo, Yanga italazimika kufikia makubaliano na Mashujaa FC, kwani beki huyo bado ana mkataba wa miaka miwili na klabu hiyo.
Mbali na Mussa, Yanga pia inatajwa kumfuatilia kwa karibu beki wa kushoto Abdulnassir Assa ‘Gammal’, ambaye naye amekuwa na msimu mzuri akiwa na Mashujaa FC.
Inaelezwa kuwa viongozi wa Yanga wanamwona Gammal kuwa mbadala sahihi wa Israel Mwenda, ambaye anatarajiwa kuondoka ndani ya kikosi hicho katika dirisha hili la usajili.
Iwapo mazungumzo yatahitimishwa kwa mafanikio, Yanga itakuwa imeongeza nguvu kubwa katika safu yake ya ulinzi kwa kuwasajili mabeki wawili waliokuwa na mchango mkubwa Mashujaa FC msimu uliopita, ikiwa ni sehemu ya maandalizi ya kutetea ubingwa wa Ligi Kuu Tanzania Bara na kufanya vizuri katika michuano ya kimataifa.
