Simba Yavuruga Mipango Ya Yanga, Yatimiza Usajili Wa Nyota Wa Pembeni
UONGOZI wa Simba umeamua kufanya kweli katika harakati za kukijenga kikosi imara kuelekea msimu wa 2026/27, baada ya kufanikiwa kumsajili winga wa Afrika Kusini, Keletso Makgalwa, ambaye alikuwa akiwindwa kwa karibu na watani zao wa jadi, Yanga.
Usajili huo umeelezwa kuwa ni ushindi mkubwa kwa Simba katika vita ya kuwania saini ya nyota huyo, huku ikielezwa kuwa Yanga ilikuwa kwenye mbio za kuhakikisha inampata mchezaji huyo kutokana na uhusiano wake wa zamani na kocha wake mkuu, Manqoba Mngqithi.
Mngqithi alijaribu kumshawishi Makgalwa warejee kufanya kazi pamoja kama walivyowahi kufanya katika kikosi cha Mamelodi Sundowns, lakini winga huyo aliamua kuipa kipaumbele Simba baada ya kuvutiwa na mipango ya klabu hiyo kuelekea msimu mpya.
Makgalwa sasa atatua Msimbazi kuungana na kocha mkuu wa Simba, Steve Barker, ambaye naye ni raia wa Afrika Kusini, huku akitarajiwa kuwa sehemu muhimu ya mipango ya timu hiyo katika mashindano ya ndani na kimataifa.
Winga huyo anajiunga na Simba akitokea Sekhukhune United, ambako ameacha alama baada ya kucheza mechi 66 katika mashindano yote, akifunga mabao sita na kutoa pasi za mwisho 20.
Usajili wa Makgalwa unaongeza nguvu kwenye safu ya ushambuliaji ya Simba ambayo imekuwa ikiendelea kuboreshwa na uongozi wa klabu hiyo kwa lengo la kurejesha ubingwa wa Ligi Kuu Tanzania Bara na kufanya vizuri katika mashindano ya Afrika.
Nyota huyo anatarajiwa kuonekana kwa mara ya kwanza katika kikosi cha Simba kitakachoshiriki mashindano ya Kombe la Kagame yanayotarajiwa kufanyika Rwanda, ambapo Wekundu wa Msimbazi wamepangwa kuanza kampeni yao Julai 25, 2026 dhidi ya Mogadishu City katika Uwanja wa Pele Kigali.
