Donald Trump Kuhudhuria Fainali Ya Kombe La Dunia 2026

Donald Trump Kuhudhuria Fainali ya Kombe la Dunia 2026: Kukabidhi Kombe na Infantino

Ikulu ya Marekani (White House) imethibitisha kuwa Rais Donald Trump atakuwa miongoni mwa wageni mashuhuri watakaoshuhudia fainali ya Kombe la Dunia 2026. Fainali hiyo ya kukata na shoka kati ya Argentina na Hispania inatarajiwa kupigwa Jumapili hii kwenye Uwanja wa New York/New Jersey.

Hii itakuwa mara ya kwanza kwa Rais Trump kuhudhuria mubashara mechi ya Kombe la Dunia, licha ya kuwa amekuwa mstari wa mbele kuunga mkono mchezo wa soka na kushiriki kikamilifu katika maandalizi ya michuano hii mikubwa inayofanyika kwa pamoja nchini Marekani, Canada, na Mexico.

Kushiriki Sherehe za Ubingwa

Rais wa Shirikisho la Mpira wa Miguu Duniani (FIFA), Gianni Infantino, amethibitisha rasmi kuwa Trump atashiriki katika sherehe za utoaji wa tuzo na kukabidhi kombe kwa mabingwa wapya mara baada ya kipenga cha mwisho.

Hatua hii inaendeleza utamaduni wa viongozi wakuu wa nchi wenyeji kuwa sehemu ya fainali. Ikumbukwe kuwa mwaka 2022, Amir wa Qatar, Sheikh Tamim bin Hamad Al Thani, alishiriki kukabidhi kombe kwa Argentina, huku Rais wa Urusi, Vladimir Putin, akifanya hivyo kwa Ufaransa mwaka 2018 mjini Moscow.

Uhusiano wa Trump na FIFA

Trump si mgeni kwenye majukwaa ya FIFA. Mwaka jana, alihusika katika kukabidhi taji la Kombe la Dunia la Klabu kwa timu ya Chelsea. Tukio hilo lilizua gumzo kubwa baada ya Trump kubaki jukwaani wakati wachezaji wakisherehekea, jambo ambalo kiungo Cole Palmer alikiri kuwa liliwashangaza wachezaji wengi wa Chelsea.

Aidha, Rais huyo ana urafiki wa karibu na Rais wa FIFA, Gianni Infantino, ambaye mnamo Desemba 2025 alimtunuku Trump Tuzo ya Amani ya FIFA.

Kabla ya kuelekea uwanjani Jumapili kushuhudia miamba hiyo miwili (Argentina vs Hispania), Trump anatarajiwa kuwa mwenyeji wa hafla maalum ya FIFA itakayofanyika ndani ya jengo lake maarufu la Trump Tower lililopo mjini New York.