Kelvin Nashon Aweka Wazi Mipango Yake Simba SC: “Sina Presha, Nipo Tayari Kupambania Beji”

Wakati usajili mkubwa wa Simba SC kuelekea msimu wa 2026/27 ukiendelea kuibua mjadala mzito miongoni mwa mashabiki kuhusu nani ataanza kikosi cha kwanza, kiungo mpya wa timu hiyo, Kelvin Nashon, ameonyesha utulivu na kusema yupo tayari kwa mapambano.

Nyota huyo, ambaye ni miongoni mwa ingizo jipya katika kikosi cha Wekundu wa Msimbazi, amebainisha kuwa anafahamu vyema ukubwa wa klabu hiyo na ushindani uliopo. Hata hivyo, amesisitiza kuwa hilo halimtishi bali ndiyo sababu kuu iliyomvutia kujiunga na miamba hiyo ya Msimbazi.

“Nimekuja kupigania beji ya Simba SC. Mimi ni mshindani, na nilipokubali kusaini hapa nilijua kabisa nakwenda sehemu ambayo hakuna namba ya bure. Kila mchezaji anapaswa kuonyesha ubora wake ili astahili kucheza,” alisema Nashon.

Ushindani wa Eneo la Kiungo na Maamuzi ya Kocha

Kauli hiyo ya Nashon inakuja wakati Simba ikiwa imeongeza nguvu kubwa eneo la kiungo baada ya kukamilisha usajili wa wachezaji wengine wakali, akiwemo Ibraheem Jabaar.

Akimzungumzia Kocha Mkuu, Steve Barker, Nashon ameeleza kuwa hana presha ya kuwaza nani ataanza kwenye kikosi cha kwanza, bali lengo lake ni kutoa jasho mazoezini na kumuweka mwalimu kwenye wakati mgumu wa kuchagua.

“Jukumu langu ni kufanya kazi kwa bidii mazoezini na uwanjani. Nitampa mwalimu Steve Barker wakati mgumu wa kuchagua kikosi. Nikipata nafasi ya kucheza ni vizuri, na nisipocheza nitaendelea kupambana kwa sababu naamini ushindani ndio unaojenga timu kubwa,” aliongeza kiungo huyo.

Uzoefu Mpana Katika Ligi Kuu

Nashon si mgeni na ushindani wa soka la Bongo. Maisha yake ya soka yamempitisha katika klabu kadhaa za Ligi Kuu ikiwemo JKT Tanzania, Geita Gold, Singida BS, Mtibwa Sugar, na Pamba Jiji, uzoefu unaomfanya kuwa na muunganiko mzuri wa ustahimilivu na ukomavu uwanjani.

Kwa sasa, Kelvin Nashon yupo pamoja na kikosi cha Simba kilichoweka kambi jijini Kigali kujiandaa na msimu mpya.