Ndoto za Kenya Fainali za Afrika Zazidi Kufifia Baada ya Kupigwa na Senegal
RABAT, MOROCCO — Ndoto za timu ya taifa ya mpira wa miguu ya wanawake ya Kenya (Harambee Starlets) kufuzu hatua ya robo fainali ya Kombe la Mataifa ya Afrika kwa Wanawake (WAFCON 2026) zimezidi kuwa finyu baada ya kukubali kichapo cha pili mfululizo katika Kundi A.
Kenya imechapwa bao 1-0 dhidi ya Senegal katika mchezo uliopigwa kwenye Uwanja wa Stade Olympique de Rabat nchini Morocco.
Bao hilo pekee lililowaua Harambee Starlets lilifungwa na Seynabou Mbengue katika dakika ya 35 ya mchezo, ushindi ambao umeirejeshea Senegal matumaini ya kutinga hatua inayofuata baada ya awali kupoteza mechi yao ya kwanza 2-0 dhidi ya Algeria.
Uchambuzi na Takwimu za Mchezo
Licha ya Kenya kupoteza mchezo huo, mechi hiyo ilikuwa na ushindani mkali wa aina yake:
-
Ummiliki wa Mpira: Kenya iliongoza kwa kumiliki mpira kwa asilimia 51.4% dhidi ya 48.6% za Senegal.
-
Mashuti Langoni: Pamoja na Kenya kupiga jumla ya mashuti 22 na Senegal kupiga 21, timu zote mbili zilifanikiwa kupiga mashuti 6 pekee yaliyolenga lango.
-
Kona na Makosa: Kenya ilipata kona 6 huku Senegal ikipata 5. Hata hivyo, makosa 18 yaliyofanywa na Kenya yaliwagharimu dhidi ya makosa 13 ya Senegal.
Tofauti kubwa katika mchezo huu ilikuwa kwenye safu ya ushughulikiaji wa nafasi; Senegal ilionyesha umakini mkubwa eneo la hatari na kutumia vyema nafasi chache ilizopata kupitia Mbengue, tofauti na Kenya iliyopoteza nafasi kadhaa za wazi.
Njia ya Kenya Kuelekea Hatua Inayofuata
Baada ya kuanza mashindano kwa kichapo cha mabao 4-0 kutoka kwa wenyeji Morocco na sasa kufungwa na Senegal, Kenya inabaki mkiani mwa Kundi A ikiwa haina pointi yoyote.
Aina pekee ya miujiza itakayoivusha Kenya ni kuifunga Algeria katika mchezo wao wa mwisho wa kundi hili, huku wakitegemea matokeo ya mechi nyingine ili kupata nafasi ya Best Losers.
Hii ni mara ya pili kwa Kenya kushiriki fainali za WAFCON tangu waliposhiriki kwa mara ya kwanza mwaka 2016 nchini Cameroon, ambapo pia walitoka bila ushindi au sare yoyote.
