Mngqithi Anza Kazi Yanga: Awasoma Gaborone United Kuelekea Mchezo wa Ligi ya Mabingwa
Wakati kikosi cha Yanga kikihitimisha maandalizi ya mwisho kuelekea mchezo wao wa Ligi ya Mabingwa Barani Afrika, benchi la ufundi limeingia kwenye hatua nyingine muhimu ya kuwasoma kwa kina wapinzani wao, Gaborone United ya Botswana.
Kocha Mkuu wa Yanga, Manqoba Mngqithi, ameweka wazi kuwa tayari amewasha taa ya kijani kuanza kupitia michezo ya miamba hiyo ya Botswana. Lengo kuu ni kubaini mbinu zao, maeneo yenye udhaifu, pamoja na wachezaji hatari wanaoweza kuleta madhara katika mchezo huo utakaopigwa Jumamosi, Septemba 5, nchini Botswana.
Changamoto ya Uchache wa Michezo Hata hivyo, Mngqithi amebainisha kuwa mchakato huo umekabiliwa na changamoto kidogo kutokana na wapinzani wao kutocheza mechi nyingi hivi karibuni ambazo zingeweza kutumika kwa uchambuzi wa kina zaidi.
“Kazi hiyo imekuwa na changamoto kiasi kutokana na wapinzani wetu kutokuwa na idadi kubwa ya michezo ya hivi karibuni. Hata hivyo, tunaendelea kutathmini kwa umakini michezo michache waliyocheza,” alisema Mngqithi.
Video Tatu Zatosha Kutoa Picha Kamili Pamoja na changamoto hiyo, kocha huyo raia wa Afrika Kusini alisisitiza kuwa video za michezo tatu walizofanikiwa kuzipata zinatosha kuwapa mwongozo na picha halisi ya mfumo wa uchezaji wa Gaborone United.
“Michezo mitatu tuliyonayo inatusaidia kupata picha nzuri ya ubora na maeneo yao ya udhaifu. Tunawafuatilia kwa karibu wachezaji wao tegemeo ili kuweka mikakati thabiti ya kuwadhibiti tutakapokutana nao Jumamosi,” aliongeza Mngqithi.
Kwa sasa, benchi la ufundi linaendelea kukinoa kikosi hicho ili kuhakikisha wachezaji wanakuwa katika hali bora ya kimwili, kiakili na kimbinu. Yanga ipo nchini Botswana ikilenga kupata matokeo chanya kwenye mchezo huo wa mkondo wa kwanza kabla ya kurejea Dar es Salaam kwa mchezo wa marudiano.
