Habari za michezo

Kocha wa Zimamoto Bares Afichua Mbinu Mpya Ligi Kuu Zanzibar

Vardo September 20, 2026 5:49 pm

KOCHA Mkuu wa timu ya Zimamoto, Abdallah Mohammed ‘Bares’, ameweka wazi kuwa kiu yake ya kupata ushindi kwenye kila mchezo ndiyo inayomfanya abadilishe mbinu na mitindo ya uchezaji mara kwa mara ili kuwachanya wapinzani wake.

Bares amefunguka hayo mara baada ya kikosi chake kuibuka na ushindi mnono wa mabao 2-0 katika mwendelezo wa mechi za Ligi Kuu Zanzibar zilizopigwa Septemba 11, 2026.

“Binafsi huwa natamani kupata ushindi kwa kila mechi iliyopo mbele yangu, ndio sababu ya kuja na mpango kazi na mkakati mpya kila mara ili mpinzani iwe ngumu kunielewa,” alisema Kocha Bares.

Katika mchezo huo uliopigwa kwenye Uwanja wa Mao kisiwani Unguja, mabao ya ushindi ya Zimamoto yalifungwa na Rashid Said katika dakika ya 17 pamoja na Samson Emmanuel aliyepigilia msumari wa mwisho dakika ya 89.

Upungufu Kikosini na Shinikizo la Wachezaji Licha ya kuondoka na pointi tatu muhimu, Kocha Bares amekiri kuwa kikosi chake hakikuonyesha kiwango bora cha uchezaji kama alivyotarajia. Alibainisha kuwa shinikizo na presha ya mchezo mara nyingi huwafanya wachezaji kupoteza umakini, lakini amekuwa akifanya kazi ya kuwatuliza ili wasitoke nje ya mfumo.

“Kuna wakati timu inapoteza umakini kwa kushindwa kufanya ambacho kinastahili kwa muda huo, lakini hawatoki nje ya mpango kazi tuliouweka,” aliongeza kocha huyo.

Msimamo na Mechi Inayofuata Hadi sasa, Zimamoto imecheza mechi tatu za Ligi Kuu Zanzibar ambapo imeshinda mbili na kutoka sare moja bila kupoteza mchezo wowote. Matokeo hayo yanaifanya ikusanye jumla ya pointi saba na kushikilia nafasi ya tano kwenye msimamo.

Kwa sasa, Zimamoto inaendelea na maandalizi makali kuelekea pambano lao linalofuata dhidi ya Wembe FC, mchezo utakaopigwa Septemba 26, 2026 katika Uwanja wa Gombani, Pemba.