Twanga Pepeta Kutua Mwanza: Bella, Nyoshi na Phina Kuwasha Moto Rock City Mall!
MAJINA makubwa kwenye kiwanda cha muziki wa dansi na burudani nchini yanatarajiwa kuweka historia mpya jijini Mwanza, wakati bendi kongwe ya Twanga Pepeta itakapofanya shoo ya kukata na shoka katika ukumbi wa The Climax, Rock City Mall.
Onyesho hilo kabambe linafanyika maalum kusindikiza uzinduzi wa albamu yao ya 16 inayokwenda kwa jina la ‘Ça Va Bien’, ikiwa ni muendelezo wa uzinduzi wa kwanza uliopata mafanikio makubwa katika Ukumbi wa Mlimani City, Dar es Salaam, Agosti 7, 2026.
Nyota Watakaopanda Jukwaani
Ili kunogesha usiku huo wa kihistoria, Twanga Pepeta itasindikizwa na wakali kibao wa muziki ikiwa ni pamoja na:
-
Christian Bella: Mfalme wa masauti mwenye uwezo mkubwa wa kutawala jukwaa na kuteka hisia za mashabiki.
-
Nyoshi El Saadat: Nguli wa muziki wa dansi aliyewahi kuzinyanyua bendi za FM Academia na Bogos Musica.
-
Phina: Mwanadada anayeendelea kufanya vizuri na kutesa kwenye viwanja mbalimbali vya burudani.
Burudani za Zamani na Mpya
Kwenye onyesho hilo, mashabiki wa Mwanza watapata fursa ya kusikiliza nyimbo mpya zilizopo kwenye albamu ya Ça Va Bien kama vile:
-
Ça Va Bien
-
Dear X
-
Usikariri
-
Usinitoe Roho
Mbali na vibao hivyo vipya, bendi hiyo itarudi kwenye hazina yake ya zamani iliyowajengea heshima kubwa nchini kwa kupiga nyimbo zilizotamba kama Password, Mwana Dar es Salaam, Walimwengu, Mmbeya, Mtu Pesa, Saudia Injinia, Aminata, na Sumu ya Mapenzi.
Uwekezaji Mkubwa Twanga Pepeta
Kuelekea uzinduzi huo, Twanga Pepeta inazidi kuonyesha ukongwe na ukubwa wake baada ya kupokea seti mpya ya vyombo vya muziki vyenye thamani ya zaidi ya Shilingi Milioni 100. Kiongozi wa bendi hiyo, Charz Baba, amethibitisha kuwa vyombo hivyo vipya vitaanza kutumika rasmi kwenye uzinduzi huo wa Mwanza.
Pia, bendi hiyo hivi karibuni ilizindua studio yake mpya maeneo ya Magomeni Usalama, Dar es Salaam, ikiwa ni sehemu ya mikakati ya kujiimarisha zaidi kimuziki. Mashabiki wa Rock City wajiandae kwa burudani ya kiwango cha juu kabisa!
