Metacha Mnata Anenepinga Presha Singida Black Stars: “Ushindani na Yona Ni Wa Kujenga”

USHINDANI mkali wa namba katika kikosi cha Singida Black Stars umeendelea kumpa chachu mlinda mlango namba moja wa timu hiyo, Metacha Boniphace Mnata, ambaye amebainisha kuwa presha hiyo badala ya kumkatisha tamaa inamfanya kuongeza juhudi kila siku.

Kipa huyo mzoefu na mlinda mlango wa timu ya taifa ‘Taifa Stars’, amepita katika klabu sita tofauti za Ligi Kuu Bara—ikiwemo Azam FC, Tanzania Prisons, Mbao FC, Yanga SC, Polisi Tanzania, na sasa Singida Black Stars.

Akizungumzia vita ya namba kati yake na mlinda mlango mwenzake Yona Amosi, Metacha amesisitiza kuwa ushindani huo ni wa kuijenga timu na wala si wa kutengeneza uhasama.

“Ushindani uliopo ni mzuri na wa kupambana ili klabu ifanye vizuri zaidi. Tunapushiana na kusapotiana mimi na Yona. Yeyote atakayepata nafasi anapaswa kuungwa mkono—kama si mimi ni yeye, na kama si yeye ni mimi. Muhimu ni ushirikiano ili timu ipate matokeo,” amesema Metacha.

Amesema siri kuu inayomsaidia kulinda nafasi yake ni nidhamu ya kazi pamoja na kujituma kwa kiwango cha juu mazoezini.

“Kwanza ni nidhamu, kisha juhudi mazoezini. Unapocheza mechi, unatakiwa kuhakikisha unakuwa bora zaidi ya jana. Kila mechi mpya ni fursa ya kuonyesha kiwango bora zaidi,” aliongeza.

Takwimu za Makipa wa Singida Black Stars Msimu Huu:

• Metacha Mnata: Amecheza mechi 4 za Ligi Kuu Bara, ameruhusu mabao 5 na kufanikiwa kupata cleansheet 1.

• Yona Amosi: (Aliyetua kutoka Pamba Jiji na kuwahi kuitumikia Tanzania Prisons) Amecheza mechi 2 na kuruhusu mabao 4 bila cleansheet.