Kocha Coastal Union Afunguka Mipango Mizito ya Farid Mussa “Wakati Umefika”

Winga machachari, Farid Mussa, anaonekana kuwa miongoni mwa silaha nzito ambazo Coastal Union ilikuwa ikizisubiri kwa hamu kubwa, huku Kocha Mkuu wa timu hiyo, Fikiri Elias, akithibitisha kuwa wakati umefika kwa mchezaji huyo kuanza kuonyesha cheche zake uwanjani.

Farid Mussa, ambaye alijiunga na Wagosi wa Kaya msimu huu akitokea Yanga SC, amekuwa akipewa programu maalum ya kurejesha utimamu wa mwili (fitness) na kujiweka sawa baada ya kukaa nje ya mechi za ushindani kwa muda mrefu akiwa na klabu yake ya zamani.

Programu Maalum ya Kocha Fikiri Elias

Akizungumza kuhusu maendeleo ya winga huyo, Kocha Fikiri Elias ameeleza kuwa benchi la ufundi liliona ni busara kumpa mchezaji huyo muda wa kutosha kujiandaa kabla ya kumtosa kwenye vita za Ligi Kuu.

“Farid alikuwa anawekwa sawa kwa sababu alitoka kwenye kipindi ambacho hakuwa anapata mechi za ushindani. Tuliona ni muhimu kumpa muda wa kujiandaa vizuri na kufikia kiwango tunachokitaka. Sasa anaamini anaweza kuanza kutumika zaidi na kuwa sehemu muhimu ya mipango yetu,” alisema Kocha Elias.

Uzoefu na Mchango wa Farid Mussa Coastal Union

Kocha Elias ameongeza kuwa uzoefu mkubwa alionao Farid Mussa katika soka la ndani na kimataifa utakuwa ni chachu kubwa ya mafanikio kwa Coastal Union, hasa katika kipindi hiki ambacho timu inahitaji wachezaji wenye uwezo wa kubadilisha matokeo.

“Farid ni mchezaji mwenye uzoefu mkubwa, amepita kwenye timu kubwa na mazingira tofauti ya ushindani. Akianza kucheza kwa kiwango tunachokitarajia, atatupa kitu kikubwa sana ndani ya timu,” aliongeza kocha huyo.

Kwa upande wake, Farid Mussa alishawahi kuweka wazi kuwa mara baada ya kujiunga na Coastal Union, alifanya mazungumzo na benchi la ufundi na kuomba muda wa kufanya maandalizi ya kutosha ili anapoingia uwanjani aweze kuipigania timu hiyo kwa kiwango cha juu.