Raia wa Oman Kumfika Zanzibar Kushuhudia Fainali

Viongozi mbalimbali kutoka nchini Oman wameeleza kuvutiwa na mazingira ya Zanzibar na kuahidi kuwashawishi wananchi wa nchi hiyo kumiminika kwa wingi kisiwani hapa kushuhudia Fainali za Kombe la Mataifa Afrika (AFCON 2027).

Kauli hiyo imetolewa na Msimamizi Mkuu wa Kongamano la Waandishi wa Habari wa Zanzibar na Oman, Abdallah Al-rubaiey, wakati wa kongamano lililofanyika katika Hoteli ya Golden Tulip, Unguja.

Uhusiano wa Kihistoria na Utalii wa Michezo

Al-rubaiey amebainisha kuwa uamuzi huo unachangiwa na historia ndefu pamoja na undugu wa damu uliopo kati ya Zanzibar na Oman. Kutokana na misingi hiyo, ujio wa raia wa Oman wakati wa AFCON 2027 utakuwa zaidi ya utalii wa michezo—utakuwa ni fursa ya kutembelea ndugu, jamaa na kujionea utamaduni wa pamoja.

“AFCON 2027 itakuwa fursa nzuri kwetu kuendeleza umoja na mshikamano. Nitawashawishi wananchi wa Oman kufika kisiwani hapa kusherehekea mashindano hayo na kudumisha uhusiano wetu wa kihistoria,” alisema Al-rubaiey.

Maandalizi ya Miundombinu Yavutia Wafanyabiashara na Watalii

Viongozi hao wamepongeza pia maandalizi makubwa yanayofanywa na Serikali ya Mapinduzi ya Zanzibar, ikiwemo ujenzi wa viwanja vya kisasa vya michezo na uboreshaji wa miundombinu ya barabara. Hatua hizi zinakamilisha hamu ya raia wa Oman na wageni wengine duniani kote kuja kushuhudia mechi za kimataifa katika mazingira tulivu ya Zanzibar.

Miji na Viwanja Vitakavyotumika AFCON 2027

Tanzania inatarajiwa kuwa mwenyeji mwenza wa mashindano hayo makubwa barani Afrika yanayotarajiwa kufanyika kuanzia Juni 19, 2027 hadi Julai 17, 2027, ikishirikiana na nchi za Kenya na Uganda.

Kwa upande wa Tanzania, viwanja vitakavyotumika ni:

• Uwanja wa Benjamin Mkapa (Dar es Salaam)

• Uwanja wa Samia Suluhu Hassan (Arusha)

• Uwanja wa Fumba (Zanzibar)