Kocha wa Mtibwa Sugar: Wachezaji Kuondoka Sio Mwisho wa Timu
KOCHA Mkuu wa Mtibwa Sugar, Awadh Juma ‘Maniche’, amewasihi mashabiki wa timu hiyo kuendelea kuwaunga mkono kama kawaida, licha ya kuwepo kwa hofu kufuatia wachezaji wengi wa kikosi hicho kuondoka na kujiunga na klabu mbalimbali za Ligi Kuu.
Akizungumza na Soka la bongo, Maniche ameweka wazi kuwa mpira wa miguu ni ajira na wachezaji hutegemea soka kujipatia kipato chao cha kila siku. Hivyo, inapotokea fursa nzuri sehemu nyingine, inakuwa vigumu kuwazuia, hali ambayo ni ya kawaida katika michezo ya kisasa.
“Ninachowaomba mashabiki wetu waendelee kuonyesha sapoti yao ili tutimize malengo ya kuirudisha tena Mtibwa Sugar Ligi Kuu. Sio muda wa kuangalia ya nyuma, isipokuwa tunapambana kutengeneza kikosi imara na cha ushindani,” amesema Maniche.
Maniche ndiye kocha aliyeipandisha daraja Mtibwa Sugar kutoka Championship hadi Ligi Kuu Bara msimu wa 2024-2025, kabla ya kushuka tena msimu uliofuata ambapo walimaliza katika nafasi ya 15 na pointi 27. Licha ya changamoto hizo, amesema mwenendo wa sasa wa timu hiyo ni mzuri na unatoa matumaini makubwa.
Katika mechi nne ilizocheza Mtibwa Sugar kabla ya mchezo wao ugenini dhidi ya IAA SC mjini Arusha, timu hiyo imeshinda mbili, imetoa sare moja na kupoteza moja pekee. Matokeo haya yameifanya iwe nafasi ya sita ikiwa na pointi saba, huku ikifunga mabao 4 na kuruhusu 3 pekee.
