Maandalizi Tamati Mashindano ya Obaro 7s,Twiga Kings Yaivaa Afrika Kusini

MKURUGENZI wa ufundi wa mchezo wa raga nchini, Erik Mulamula, amewatoa hofu Watanzania na kuweka wazi kuwa maandalizi ya timu ya taifa ya raga ya wanaume, Twiga Kings, yamekamilika kwa lengo la kujenga kikosi imara kitakachowasha moto kwenye mashindano ya kimataifa ya Obaro 7s nchini Afrika Kusini.

Akizungumza kuhusu maandalizi hayo, Mulamula ameeleza kuwa benchi la ufundi limetumia muda wa kutosha kuchagua wachezaji wenye vipaji vya hali ya juu, kuboresha mbinu za uwanjani, na kuimarisha maelewano ili kuhakikisha kikosi kinakuwa na ushindani mkubwa uwanjani.

Mashindano haya ya kimataifa yanatarajiwa kupigwa jijini Pretoria, Oktoba 24 na 25 mwaka huu, yakiwa ni fursa ya dhahabu kwa Twiga Kings kupima ubora wao dhidi ya miamba ya mataifa mengine na kupeperusha bendera ya Tanzania juu.

“Katika maandalizi yetu, tumejikita katika kuchagua kikosi chenye uwezo, kuboresha matumizi ya mbinu za mchezo na kuhakikisha wachezaji wanaelewana na kushirikiana wanapokuwa uwanjani,” alisema Mulamula.

Aliongeza kuwa: “Obaro 7s ni fursa muhimu kwa wachezaji wetu kupima uwezo wao dhidi ya timu za kimataifa, kupata uzoefu na kuonyesha uwezo halisi wa raga ya Tanzania.”

Mulamula Aipa Maua SportPesa

Wakati huo huo, uongozi wa benchi la ufundi umeonyesha shukrani za dhati kwa kampuni ya michezo ya kubahatisha ya SportPesa kwa kuendelea kuwa nguzo kuu katika kufadhili na kuunga mkono mafanikio ya Twiga Kings, msaada ambao umechochea kwa kiasi kikubwa maendeleo ya mchezo wa raga nchini.

Baada ya mchakato mkali wa kitathmini na mchujo uliopimwa kwa uwezo, mbinu, na utayari wa ushindani, kikosi cha mwisho cha wachezaji 13 mashujaa kimethibitishwa kubeba jukumu hili zito la kuitetea Tanzania.

Twiga Kings sasa inaelekeza nguvu zake zote nchini Afrika Kusini, ikiwa na kiu moja tu ya kuandika historia mpya na kuinua heshima ya nchi katika medani za kimataifa za raga.