Habari za michezo

Kinda wa Tanzania Barka Seif Afichua Siri Nzito Ndani ya La Masia

Vardo October 26, 2026 8:12 am

Kinda wa Kitanzania anayekipiga katika akademi maarufu ya Hispania ya La Masia, Barka Seif, amesema anajisikia furaha kubwa kuwaona wachezaji wakubwa wanaofanya vizuri Barcelona, huku akiamini siku moja naye atacheza kwa kiwango hicho kikubwa.

Akizungumza na Soka La Bongo, baba mzazi wa kinda huyo, Seif Mpanda, amesema kiungo huyo mshambuliaji amekuwa akizungumza kwahamasa tangu ajiunge na akademi hiyo msimu huu.

Barka amekuwa akivutiwa na mastaa wanaong’ara na anatamani kupata nafasi ya kukutana nao ana kwa ana, kufanya nao mazoezi au kubadilishana nao mawazo.

Kukutana na Mastaa Wakubwa

Kwa mujibu wa baba yake, Barka tayari ameshapata nafasi ya kukutana na baadhi ya wachezaji wakubwa akiwemo Karim Adeyemi na Patri Guijarro, jambo ambalo limempa hamasa kubwa ya kufikia malengo yake ya kucheza timu ya kwanza ya Barcelona.

“Anatamani kukutana na wachezaji wote wa Barcelona na ameshakutana na baadhi yao. Wachezaji kama Lamine Yamal na Raphinha wanacheza vizuri sana na anavutiwa nao mno,” amesema Mpanda na kuongeza: “Ndio, alishawahi kuniambia anatamani siku moja afike pale. Tayari amefanikisha ndoto ya kucheza kwenye akademi, na anaamini atapata nafasi ya kudumu Barcelona.”

Tasmini ya Makocha na Rekodi Yake

Baba yake ameongeza kuwa kiwango anachokionyesha kinda huyo kinawakosha makocha wa La Masia, ambao wanaamini katika uwezo wake na ukuaji wake kisoka.

“Tathmini ya makocha wa La Masia kuhusu maendeleo ya Barka ni kwamba wanamtazama kama kijana ambaye atakuja kuwa hatari sana mbeleni,” alieleza.

Kabla ya kutua La Masia mnamo Juni 2026, Barka alikuwa akiitumikia CF Damm, ambako alionyesha maajabu kwa kufunga mabao 41 katika mechi 28 za ligi ya vijana msimu wa 2025/26. Pia alifunga mabao 18 katika mechi 20 na kuchaguliwa kwenye kikosi bora cha vijana chini ya miaka 12 cha Catalonia.

Tangu atue Barcelona, ameendelea kuonyesha cheche zake kwa kufunga mabao sita katika mechi tatu za ligi ya vijana, akithibitisha kuwa yeye ni lulu inayochipukia kwa kasi kwenye soka la kimataifa.