Mjumbe Mtanzania Adi Yussuf Ampandishwa Cheo Kikubwa Leicester City
Nyota wa zamani wa soka wa kimataifa wa Tanzania (Taifa Stars) na akademi ya Leicester City, Adi Yussuf, ameendelea kung’ara katika safari yake ya ukocha baada ya kuteuliwa rasmi kuwa kocha msaidizi wa kikosi cha vijana cha U21 cha klabu hiyo.
Yussuf, ambaye hapo awali alikuwa akihudumu kama kocha msaidizi wa kikosi cha vijana cha U18, amepandishwa cheo kufuatia kazi yake nzuri baada ya kutangaza kustaafu soka la ushindani.
Safari Yake ya Soka na Ukocha
Adi Yussuf alianza safari yake ya soka katika akademi ya Leicester City na kucheza mara kwa mara katika kikosi cha akiba kabla ya kuzitumikia klabu mbalimbali nchini Uingereza, zikiwemo:
-
Burton Albion
-
Mansfield Town
-
Solihull Moors
-
Crawley Town
-
Oxford City
Katika timu ya taifa ya Tanzania (Taifa Stars), Yussuf aliichezea mechi 4 za kimataifa baada ya kufanya uamuzi wa kuitumikia nchi yake ya asili kuanzia Juni 2019.
Akiwa bado anacheza soka katika klabu ya Halesowen Town, Yussuf alirejea Leicester City kupitia mpango maalum wa Premier League’s Professional Player to Coach Scheme (PPCS) unaowasaidia wachezaji wa zamani kuingia kwa urahisi katika taaluma ya ukocha. Mwaka uliopita, alifanya kazi kubwa na kikosi cha U18 chini ya kocha Adam Barradell.
pongezi Nzitokwa kwa Nyota Huyu
Kupitia ukurasa wake wa Instagram, Yussuf alieleza furaha yake kubwa akisema:
“Nina furaha kutangaza kwamba nimeanza nafasi mpya ya kocha msaidizi wa U21 katika klabu ya Leicester City. Nashukuru kwa fursa hii ya kupiga hatua nyingine katika safari yangu ya ukocha.”
Uteuzi huu umezua shangwe kubwa miongoni mwa wachezaji na mastaa wa zamani na wa sasa wa Leicester City, akiwemo kocha wa kikosi cha kwanza Andy King, pamoja na wachezaji kama Kasey McAteer, Ben Nelson, na wengineo walioonyesha kuguswa na mafanikio yake.
Mbali na soka, Yussuf pia ni mjasiriamali na mwanzilishi wa kampuni ya mavazi ya michezo ya nogoalsnosleep, huku hivi karibuni akiandaa mashindano maalumu yaliyohudhuriwa na magwiji wa zamani wa Leicester City kama Wes Morgan, Liam Moore na Jeffrey Schlupp.
