Michezo Bongo

Uwanja wa Mao Zedong Waingiza Sh47.4 Milioni Ndani ya Miezi Mitatu Zanzibar!

Vardo November 13, 2026 5:50 pm

ZANZIBAR – Baraza la Jiji Zanzibar limefanikiwa kukusanya jumla ya Sh47.4 milioni kutokana na shughuli mbalimbali zilizofanyika katika Uwanja wa Mao Zedong, mjini Unguja, katika kipindi cha miezi mitatu kuanzia Julai hadi Septemba, 2026.

Akiwasilisha taarifa ya utekelezaji wa shughuli za baraza hilo kwa robo ya kwanza ya mwaka wa fedha 2026/2027 katika ukumbi wa mikutano wa Michenzani Mall, Mwenyekiti wa Baraza la Jiji Zanzibar, Salmin Amour Abdalla, amesema mafanikio hayo yametokana na mikakati madhubuti iliyowekwa baada ya Serikali kuwakabidhi jukumu la kusimamia uwanja huo.

Mikakati Iliyoongeza Mapato

Kwa mujibu wa Salmin, miongoni mwa hatua zilizochukuliwa na baraza hilo kuongeza ufanisi na makusanyo ni pamoja na:

Kuimarisha mifumo ya usimamizi na udhibiti wa mapato.
Kushirikisha sekta binafsi katika utoaji wa huduma za usafi na usimamizi wa maegesho ya magari.
Kutumia mifumo ya kisasa katika uendeshaji wa shughuli za uwanja.

Matumizi ya Mapato na Maboresho ya Miundombinu

Aidha, Mwenyekiti huyo alibainisha kuwa baraza linaendelea na mazungumzo na Wizara ya Fedha ili kupata idhini ya kutumia sehemu ya mapato yanayokusanywa uwanjani hapo kugharamia uendeshaji wake.

“Idhini hiyo ikipatikana, fedha hizo zitasaidia kugharamia huduma za usafi, umeme na matengenezo ya miundombinu,” alisema Salmin.

Aliongeza kuwa lengo kuu la hatua hizo ni kuhakikisha Uwanja wa Mao Zedong unakuwa na mazingira bora, unatoa huduma zenye viwango kwa watumiaji, na kuendelea kuwa chanzo endelevu cha mapato kwa baraza hilo.

Kwa sasa, uwanja huo upo chini ya uangalizi wa Baraza la Jiji Zanzibar kufuatia mkataba wa miaka mitatu walioingia na Wizara ya Habari, Sanaa, Utamaduni na Michezo Zanzibar.