Mambo 10 Usiyoyajua Kuhusu Ray C: Safari Yake ya Muziki na Tuzo

Historia ya muziki wa Bongofleva haiwezi kukamilika bila kulitaja jina la Rehema Chalamila, maarufu kama Ray C. Huyu ni mmoja wa wanamuziki wa kike walioweka alama isiyofutika katika tasnia ya burudani Tanzania, akijijengea himaya kubwa na heshima ya kipekee kupitia uimbaji na uchezaji wake.

Zaidi ya kutoa albamu kali na kushinda tuzo kubwa, nguvu ya ushawishi ya Ray C ilimfanya ashiriki katika miradi na kampeni mbalimbali za kijamii. Haya hapa ni mambo 10 muhimu yanayoelezea safari ya mafanikio ya mkali huyu wa “Kiuno Bila Mfupa”:

1. Alianza Kama Mtangazaji wa Redio Kabla ya kuteka mashabiki kwenye jukwaa la muziki, Ray C na msanii mwenzake Stara Thomas waliwahi kuwa watangazaji wa East Africa Radio kwa nyakati tofauti. Baadaye, Ray C alihamia Clouds FM, kituo ambacho kilifungua milango rasmi ya safari yake ya muziki.

2. Orodha ya Watangazaji Walioibukia Kwenye Muziki Mbali na Ray C na Stara Thomas, tasnia ya Bongofleva imeshuhudia mastaa wengine wengi waliotoka kwenye utangazaji na kufanya makubwa kwenye muziki. Miongoni mwao ni TID (Magic FM), Lady Jaydee (Clouds FM), pamoja na Vanessa Mdee aliyewahi kutangaza MTV Base na Choice FM.

3. Ruge Mutahaba Ndiye Aliyegundua Kipaji Chake Aliyekuwa Mkurugenzi wa Vipindi na Uzalishaji wa Clouds Media Group, hayati Ruge Mutahaba, ndiye aliyemshawishi Ray C kuingia studio baada ya kuona uwezo wake mkubwa. Wakati huo, Ruge tayari alikuwa akiwasimamia wakali wengine kama Lady Jaydee na Banana Zorro kupitia lebo ya Smooth Vibes.

4. Nguli wa Taarabu Alimuandikia Wimbo wa Kwanza Wimbo uliomtambulisha rasmi Ray C kwenye ramani ya muziki, Mapenzi Yangu (2003), uliandikwa na mwanamuziki mkongwe wa Taarabu, Patricia Hillary. Wimbo huo ulifanya vizuri kiasi cha kubeba jina la albamu yake ya kwanza.

5. Alitawala Tuzo za Muziki Tanzania (TMA) Ubora wa Ray C ulidhihirika wazi mwaka 2003 na 2007 alipofanikiwa kushinda Tuzo za Muziki Tanzania (TMA) katika kipengele cha Msanii Bora wa Kike. Katika miaka yote miwili, msanii mwenzake kutoka Smooth Vibes, Banana Zorro, ndiye aliyeshinda kipengele cha Msanii Bora wa Kiume.

6. Albamu ya ‘Sogea Sogea’ Iliwakutanisha Wakali wa Marekani Albamu yake ya pili iliyoitwa Sogea Sogea (2007) ilisheheni kolabo kali zilizowashirikisha TID, Nako 2 Nako Soldiers, pamoja na D. Gritty kutokea Marekani. D. Gritty alikuja Tanzania mwaka 2006 akiwa ameongozana na rapa Loon aliyekuja kushuti video ya wimbo Distracted (ambayo Miss Tanzania 2005, Nancy Sumari alitokea). Wakiwa Bongo, Loon na D. Gritty walishiriki pia kwenye wimbo Worldwide Bachelor wa Ibra Da Hustler uliotayarishwa na Dunga wa Mandugu Digital.

7. Kolabo na Mapenzi na Lord Eyes Mwaka 2007, Ray C aliwashirikisha wasanii wa kundi la Nako 2 Nako (Lord Eyes na Ibra Da Hustler) katika wimbo wake pendwa wa Kwa Ajili Yako uliotayarishwa na Dunga. Wakati wimbo huu unafanyika, Ray C na Lord Eyes walikuwa kwenye mahusiano ya kimapenzi.

8. Mastaa Wengine Waliowahi Kuwa Wapenzi na Kutoa Nyimbo Pamoja Ray C na Lord Eyes siyo wapenzi pekee waliowahi kutengeneza “hit songs” pamoja. Wengine ni pamoja na:

• Lady Jaydee na Spicy Music (Together Remix)

• Diamond Platnumz na Tanasha Donna (Gere)

• Vanessa Mdee na Jux (Juu & Sumaku)

• Amini na Linah (Mtima Wangu & Nimenasa)

• Kusah na Ruby (Kelele, Chelewa & Nadondosha)

• Izzo Bizness na Abela (Dangerous Boy, Umeniweza & Tumeoana)

• One The Incredible na Grace Matata (Salamu & Light It Up)

• Shilole na Nuh Mziwanda (Ganda la Ndizi)

9. Alivutiwa Zaidi na Ciara Pamoja na Rihanna Baada ya kufikia kilele cha mafanikio katika muziki wa Bongofleva, Ray C aliwahi kubainisha kuwa waimbaji wawili wa kike kutokea Marekani waliomvutia zaidi kisanaa ni Ciara pamoja na bilionea kutokea Barbados na mshindi wa tuzo za Grammy mara tisa, Rihanna.

10. Jina la ‘Kiuno Bila Mfupa’ Lilitajwa Kwenye Nyimbo Nyingi Kutokana na umahiri wake wa kuzungusha nyonga jukwaani, Ray C alibatizwa jina la Kiuno Bila Mfupa. Sifa hii ilikuwa kubwa kiasi cha wasanii wakubwa kuitaja kwenye nyimbo zao, wakiwemo Mwana FA (Mabinti – 2002), Fid Q (Kadi na Ua Rose – 2005), Mangwair (Speed 120 – 2010), Young Killer (Mrs SuperStar – 2013), na Harmonize (Uno – 2019).