Kipa wa KVZ Idrissa Mguya Afichua Siri ya Mechi ya Yanga: “Wapinzani Wajiandae!”
Kipa wa KVZ Idrissa Mguya amevunja ukimya na kuwatumia salamu nzito wapinzani wao wa Ligi Kuu Zanzibar, akisisitiza kuwa kipimo walichokipata kutoka kwa mabingwa watetezi wa Tanzania Bara, Yanga SC, kimewaacha wakiwa na makali mapya na ukomavu wa hali ya juu.
Mchezo huo wa kirafiki uliopigwa Novemba 14, 2026, katika dimba la Maisara kisiwani Unguja, ulikuwa na burudani ya kipekee ambapo licha ya KVZ kuanza kuwachokoza wananchi kwa bao la mapema kupitia kwa Mudrick Abdi ‘Gonda’, Yanga walicharuka na kushinda 3-1 kwa mabao ya Cheikh Toure (mawili) na Edmund John, huku fundi wa mpira Aziz KI akipiga “hat-trick” ya asisti.
Hata hivyo, badala ya matokeo hayo kuwavunja moyo, Kipa wa KVZ Idrissa Mguya anaamini dakika 90 dhidi ya nyota hao wa Jangwani zilikuwa kama darasa la bure lililowafumbua macho.
“Kukutana na timu kubwa yenye presha kubwa kama Yanga kumetufundisha mambo mengi kwa vitendo. Sasa tunajua namna ya kucheza kwa nidhamu ya hali ya juu, kupandisha mashambulizi kwa kasi na kutopoteza mwelekeo hata tunapokuwa chini ya presha,” amesema Mguya kwa kujiamini.
Kwa mujibu wa mlinda mlango huyo, cheche za darasa hilo zimeshaanza kuonekana mazoezini. Wachezaji wa KVZ sasa wanamiliki mpira kwa utulivu, wanabadilishana pasi za haraka na wamepunguza kwa kiasi kikubwa makosa binafsi katika maeneo ya hatari.
Ameongeza kuwa benchi lao la ufundi limewageuzia changamoto za mchezo huo kuwa silaha ya maangamizi kwenye mechi zijazo za ligi, ili kuhakikisha hawarudii makosa yaleyale.
Kwa sasa, KVZ wanakamata nafasi ya tano kwenye msimamo wa Ligi Kuu Zanzibar wakiwa na alama 18 baada ya kushuka dimbani mara 11 (wakishinda mechi tano, sare tatu na kupoteza tatu). Safu yao ya ushambuliaji imetoboa nyavu mara 12 huku ukuta wao ukiruhusu mabao manne pekee—takwimu zinazoashiria kuwa mzunguko ujao utakuwa mgumu zaidi kwa timu zitakazokutana nao.