LIONEL Messi sasa msimu ujao atakuwa katika changamoto mpya baada ya mabosi wake Barcelona kutangaza rasmi Agosti 5 kwamba hatakuwa ndani ya kikosi hicho kutokana na anguko la kiuchumi katika timu hiyo lililotokana na janga la virusi vya Corona.
Raia huyo wa Argentina ambaye ni mshambuliaji ametumia maisha yake ya mpira ndani ya Barcelona kwa muda wa miaka 20.
Ni mshindi wa Ballon d’Or 6 akiwa amemzidi moja mshindani wake wa karibu Cristiano Ronaldo raia wa Ureno ambaye anazo tano mkononi.
Kwa muda wa miaka 20, mchango wake ni mabao 672 na amecheza jumla ya mechi 778 akiwa ni mchezaji pekee ambaye ana mabao mengi, amecheza mechi nyingi na mataji mengi ndani ya timu.
Ni mchezaji pekee ambaye katika historia alishinda Ballon d’Or, mchezaji bora wa FIFA, taji la Pichichi na kiatu cha ufungaji bora kwa msimu mmoja ilikuwa ni msimu wa 2009/10.
Pia ni mchezaji ambaye alitupia jumla ya mabao 26 katika El Clasico. Ballon d’Or zake sita ilikuwa ni 2009,2010,2011,2012,2015 na 2019.
Messi alifunga jumla ya hat trick 48 akiwa Barcelona ikiwa ni rekodi kubwa kwake ndani ya timu hiyo.
