BAADA YA KUFIKA ALGERIA….MASTAA SIMBA WAANZA ‘KISINGIZIO’ CHA BARIDI KALI 😂😂😂…

Baada ya kuwasili salama nchini Algeria mlinzi wa kulia wa Simba, Shomari Kapombe amesema wachezaji wapo tayari kufuata maelekezo ya walimu kwenye mazoezi ili kufanya vizuri katika mchezo wa Kombe la Shirikisho Afrika dhidi ya CS Constantine siku ya Jumapili.

Kapombe amesema siku mbili za mazoezi ambazo watazipata watazitumia vizuri kuhakikisha wanapata matokeo chanya ugenini.

Akizungumza kuhusu hali ya hewa ya Algeria, Kapombe amesema ni baridi kali lakini siku zilizobaki kabla ya mchezo zitasaidia kuwafanya kuzoea mazingira.

“Hali ya hewa ni baridi kali lakini tuna siku mbili za kufanya mazoezi pamoja na kuzoea mazingira tunaamini hadi kufika siku ya mchezo tutakuwa tumeshazoea,” amesema Kapombe.

MUKWALA AKAZIA ‘KILIO CHA BARIDI’…

Mshambuliaji Steven Mukwala amesema licha ya hali ya hewa kuwa baridi kali nchini Algeria lakini wataizoea hadi kufika Jumapili siku ya mchezo wa Kombe la Shirikisho Afrika dhidi ya CS Constantine.

Mukwala amesema hali ya hewa ni tofauti na jijini Dar es Salaam lakini anaamini mpaka kufika Jumapili watakuwa wamezoea na haitakuwa changamoto tena.

Akizungumzia kuhusu hali ya wachezaji baada ya safari ndefu amesema wako tayari kukamilisha programu ya mazoezi hapa Algeria kabla ya kushuka dimbani siku ya Jumapili.

“Tumefika salama Algeria, kikubwa mashabiki wa Simba watuombee tuweze kuwa salama muda wote ili kuipambania timu yetu na kuwapa furaha Wanasimba wote,” amesema Mukwala.