SIMBA imeendelea kuvutia macho ya mashabiki wake baada ya kurejea kambini kwa ajili ya kuendelea na mazoezi, ikiwa ni maandalizi ya mashindano mbalimbali inayoshiriki, ikiwemo kombe la Mapinduzi, Ligi Kuu ya Tanzania Bara na Ligi ya Mabingwa Afrika.
Miongoni mwa mambo yaliyoibua gumzo kubwa ni muonekano mpya wa beki wao wa kimataifa, Rushine De Reuck akiwa na mwonekano tofauti na wa awali, hali iliyowafanya mashabiki wengi kuonesha hisia zao kupitia mitandao ya kijamii.
Wapo waliomsifu kwa kujiamini na kuonekana mwenye umakini zaidi, wakiamini mabadiliko hayo ni ishara ya dhamira mpya ndani ya kikosi.
Rejea ya Simba kambini imekuwa fursa muhimu kwa benchi la ufundi kuwanoa wachezaji kimwili na kiufundi, huku likilenga kuboresha maeneo yaliyokuwa na changamoto katika michezo ya nyuma. Mazoezi hayo yanatajwa kuwa na ushindani mkubwa miongoni mwa wachezaji.
Kwa upande wake, De Reuck anaonekana kuwa miongoni mwa wachezaji waliodhamiria kutumia kipindi hiki kujijenga upya, si tu kwa muonekano wa nje bali pia kwa kiwango chake ndani ya uwanja. Beki huyo anatajwa kuwa na nia ya kurejesha makali yake na kuwa nguzo muhimu ya safu ya ulinzi.
Mashabiki wa Simba wana matumaini makubwa kuona mabadiliko chanya katika kikosi chao, hasa wakiamini kuwa maandalizi haya yatazaa matunda katika michezo ijayo. Muonekano mpya wa De Reuck umechukuliwa kama ishara ya mwanzo mpya ndani ya kikosi.
Kadri Simba inavyoendelea na maandalizi yake kambini, macho na masikio ya mashabiki yataendelea kufuatilia kwa karibu maendeleo ya wachezaji wao.
