KIUNGO mshambuliaji wa kimataifa wa Zambia, Rally Bwalya, anatarajiwa kujiunga na Pamba Jiji FC kwa ajili ya msimu wa 2026/27, baada ya kumaliza mkataba wake na NAPSA Stars.
Taarifa hizo zimeibuka zikieleza kuwa nyota huyo mwenye umri wa miaka 31 atawasili kama mchezaji huru, hatua inayoweza kuipa Pamba nguvu mpya katika eneo la kiungo.
Inaelezwa kuwa Bwalya alikuwa karibu kujiunga na Pamba Jiji mapema mwanzoni mwa msimu huu, lakini dili hilo halikukamilika kutokana na vipengele vilivyokwamisha kwenye mkataba wake na NAPSA Stars.
Hata hivyo, safari hii mazingira yanaonekana kuwa rafiki zaidi, jambo linaloongeza uwezekano wa uhamisho huo kukamilika bila vikwazo.
Ujio wa Bwalya unatazamwa kama nyongeza muhimu kwa kikosi cha Pamba Jiji, ambacho kinaendelea kujijenga kwa malengo ya kufanya vizuri zaidi katika mashindano ya ndani.
Uzoefu wake wa kimataifa pamoja na ubora wake wa kucheza nafasi ya kiungo mshambuliaji unaweza kuleta mabadiliko makubwa katika mfumo wa timu hiyo.
Iwapo dili hilo litakamilika kama inavyotarajiwa, mashabiki wa Pamba Jiji watakuwa na sababu ya kutabasamu wakitarajia kuona kiwango cha juu kutoka kwa kiungo huyo, tayari ameonyesha uwezo wake katika ligi ya Zambia na michuano mingine ya kimataifa.
