MOTO UNAENDELEA MSIMBAZI, KANTE AAHIDI MATAJI MAWILI MWISHO WA MSIMU

KIUNGO wa Simba SC, Allasane Kante, amesema hakuna timu itakayoweza kuizuia timu yao kutwaa ubingwa wa Ligi Kuu Tanzania Bara pamoja na Kombe la Shirikisho la CRDB.

Kauli hiyo tayari imezua mjadala mkubwa kwa mashabiki wa soka kutokana na ushindani mkali unaoendelea katika michuano hiyo.

Kante amesema ndani ya kikosi cha Simba kwa sasa kuna morali kubwa, umoja na hamasa ya kuhakikisha wanarejesha heshima ya klabu hiyo kwa kutwaa mataji mawili makubwa msimu huu. Ameeleza kuwa kila mchezaji anatambua ukubwa wa Simba na matarajio makubwa waliyonayo mashabiki wao.

Nyota huyo ameongeza kuwa Simba imekuwa na kikosi imara chenye uwezo wa kupambana katika kila mchezo, huku akisisitiza kuwa mchango wa kila mchezaji ndani ya timu hiyo ndio nguvu kubwa inayowasukuma kuelekea mafanikio wanayoyahitaji.

“Tutapambana kuhakikisha tunachukua ubingwa wa Ligi Kuu pamoja na CRDB Cup msimu huu. Tuna timu bora na tunaamini heshima ya Simba lazima irudi,” amesema Kante.

Kauli hiyo imekuja wakati Simba ikiwa kwenye kipindi kizuri cha ushindani baada ya kuonyesha kiwango bora katika michezo yake ya hivi karibuni, jambo ambalo limeongeza matumaini makubwa kwa mashabiki wa klabu hiyo kongwe nchini.

Mashabiki wa Simba wameonekana kuvutiwa na kauli ya kiungo huyo wakiamini kuwa ari na mshikamano waliyonao wachezaji unaweza kuwa silaha muhimu katika mbio za kuwania ubingwa dhidi ya wapinzani wao wakubwa.

Kadri msimu unavyozidi kupamba moto katika Ligi Kuu na michuano ya Kombe la CRDB, macho ya wengi sasa yataelekezwa kuona kama Simba itaweza kutimiza maneno ya Kante kwa kurejesha mataji Msimbazi mwishoni mwa msimu huu.