NYUMA YA YANGA KWA ALAMA MBILI, BARKER BADO ANAAMINI SIMBA KUTWAA UBINGWA
LICHA ya Simba kujikuta nyuma kwa alama mbili dhidi ya Yanga katika msimamo wa Ligi Kuu Tanzania Bara, Kocha Mkuu wa timu hiyo, Steve Barker, bado hajapoteza matumaini ya kutwaa taji la msimu huu.
Kocha huyo ameendelea kuonyesha imani kubwa kwa kikosi chake, akisisitiza kuwa mbio za ubingwa bado hazijaisha na kwamba kila kitu kinawezekana katika michezo iliyosalia kabla ya pazia la ligi kushushwa.
Barker ameweka wazi kuwa lengo kuu kwa sasa ni kuhakikisha Simba inashinda mechi zake zote tano zilizobaki ili kujikusanyia alama 15 muhimu ambazo zinaweza kuwa na mchango mkubwa katika vita ya ubingwa.
Mbali na harakati za ligi, kocha huyo pia analenga kuona timu yake ikifanikiwa kutinga fainali ya Kombe la Shirikisho la CRDB na kupambana kutwaa taji hilo, jambo ambalo linaweza kuifanya Simba kumaliza msimu kwa mafanikio makubwa.
Kwa sasa, Simba imebakiza michezo dhidi ya Pamba Jiji FC, Mbeya City, Mtibwa Sugar, Singida Black Stars na KMC FC, mechi ambazo zimepewa uzito mkubwa ndani ya kambi ya timu hiyo.
Ushindi katika michezo hiyo yote utakuwa muhimu kwa Wekundu wa Msimbazi, lakini pia matumaini yao ya kutwaa ubingwa yatategemea matokeo ya mpinzani wao mkuu Yanga, ambaye anaendelea kuongoza msimamo wa ligi.
Barker anaamini kuwa Simba inapaswa kwanza kutimiza wajibu wake kwa kushinda mechi zake zote zilizosalia, huku ikisubiri kuona kama Yanga atapoteza alama katika michezo yake iliyobaki, jambo ambalo linaweza kubadili mwelekeo wa mbio za ubingwa.
