Rasmi: Singida Black Stars Yamsajili Aubin Kramo

KATIKA kuendelea kujiimarisha kuelekea msimu mpya wa 2026/27, Singida Black Stars imekamilisha usajili wa winga hatari raia wa Ivory Coast, Aubin Kramo. Usajili huu ni sehemu ya mkakati mzito wa klabu hiyo katika kuunda kikosi chenye ushindani mkubwa kwenye mashindano ya ndani na yale ya kimataifa.

Kramo anarejea tena kwenye Ligi Kuu Tanzania Bara baada ya kuwahi kuitumikia Simba SC, ambako alijizolea sifa kubwa kutokana na kasi yake ya hatari, ubunifu wa hali ya juu, pamoja na uwezo mkubwa wa kutengeneza nafasi na kufunga mabao. Uzoefu wake mkubwa wa soka la Bongo unatajwa kuwa sababu kuu iliyomfanya kocha na uongozi wa Singida Black Stars kushinikiza saini yake.

Usajili wa nyota huyu unakuja kuongeza nguvu na chachu mpya katika safu ya ushambuliaji ya timu hiyo. Singida Black Stars imekuwa ikifanya maboresho makubwa kwenye dirisha hili la usajili kwa lengo la kuwa na kikosi kipana kitakachoweza kupigania mataji yote msimu ujao.

Kutokana na kuifahamu vyema mazingira na presha ya ligi ya Tanzania, Kramo anatarajiwa kuzoea haraka mfumo wa timu hiyo na kuwa miongoni mwa nguzo muhimu zitakazobeba matumaini ya mashabiki.

Wadau wengi wa soka wameipokea kwa hisia chanya taarifa hii, wakiamini kuwa chenga, kasi na akili ya Kramo itakuwa silaha ya maangamizi kwa wapinzani. Kwa usajili huu, Singida Black Stars inatuma ujumbe mzito kwa wapinzani wao kuwa wamejipanga kuchukua vikombe msimu wa 2026/27.