DAR ES SALAAM: Aliyekuwa Makamu Mwenyekiti wa Kamati ya Mashindano wa Klabu ya Simba, Idd Kajuna, amezikwa jioni ya leo Julai 23, 2026 katika Makaburi ya Kisutu, Dar es Salaam.

Kajuna alifikwa na umauti katika Hospitali ya Taifa Muhimbili (kitengo cha moyo cha JKCI) ambapo alikuwa akipatiwa matibabu kwa takribani siku saba.

Akizungumza wakati wa mazishi hayo, Mwenyekiti wa Bodi ya Wakurugenzi wa Simba, Crescentius Magori, amesema klabu hiyo imepoteza mpambanaji wa kweli na mtetezi wa dhati wa mambo ya Simba.

“Hizi ni taarifa mbaya sana na msiba mkubwa ndani ya Simba. Tumepoteza mtu aliyejitoa kupigana vitani kwa ajili ya klabu hii,” amesema Magori.

“Kajuna hakuwa tu kiongozi baada ya kuteuliwa; alikuwa akiipigania Simba kwa moyo wote hata kabla ya kupata nafasi hii. Ndiyo maana tukamchagua kuwa Mjumbe wa Kamati ya Mashindano.”

Mchango na Historia ya Idd Kajuna Simba SC

Kajuna aliteuliwa kuwa Makamu Mwenyekiti wa Kamati ya Mashindano ya Simba mwaka jana (2025). Kazi yake ya mwisho kuonekana akiipigania Simba ilikuwa ni Fainali ya Kombe la CRDB iliyofanyika Pemba (Julai 4, 2026), ambapo Simba iliibuka kidedea kwa kuifunga Azam FC bao 1-0 na kutwaa ubingwa.

Mbali na nafasi hiyo, Kajuna alikuwa na mchango mkubwa klabuni hapo kupitia nyadhifa mbalimbali:

• Mjumbe wa Baraza la Ushauri: Lililoundwa na Rais wa Klabu, Mohammed Dewji ‘Mo Dewji’.

• Kaimu Makamu Mwenyekiti: Mwaka 2017.

• Mjumbe wa Kamati ya Utendaji: Kuanzia mwaka 2014 hadi 2018.

• Mjumbe wa Bodi ya Mpito ya Wakurugenzi: Mwaka 2018 wakati wa mchakato wa mabadiliko ya mfumo wa uongozi Simba.

Uongozi wa Klabu ya Simba umeungana na familia, ndugu, jamaa na wadau wote wa soka nchini kuomboleza msiba huu, ukimwombea Mwenyezi Mungu aipumzishe roho yake mahali pema peponi.