Ndaro ,Rushayna kuna Jambo….

Zaidi ya miaka mitatu tangu kuvunjika kwa ndoa yake na aliyekuwa Ofisa Habari wa Simba na Yanga, Haji Manara, mwanadada Rushayna amerejea tena kwenye vichwa vya habari za burudani. Safari hii, anahusishwa kuwa katika mahusiano ya kimapenzi na mchekeshaji maarufu nchini, Ndaro.

Tetesi za wawili hao kuwa pamoja zimekuwa zikifukuta kwa miezi kadhaa, lakini zimepata nguvu mpya baada ya kukutwa wakiwa pamoja wakati wakitoka kufanya manunuzi katika jengo la Mlimani City, Dar es Salaam.

Majibu ya Utata

Walipoulizwa kuhusu ukaribu wao na kama tayari wameweka mambo hadharani, hakuna aliyetoa jibu la moja kwa moja. Badala yake, wote wawili walionekana kucheka kwa furaha huku wakikwepa kufunguka kikamilifu.

“Hakuna ubaya kuwa na mwanamke kama Rushayna. Kama ni kweli, basi mimi nimebahatika sana kuwa naye,” alisema Ndaro huku akisisitiza kuwa anampenda sana mwanadada huyo.

Kwa upande wake, Rushayna hakukanusha wala kuthibitisha tetesi hizo zaidi ya kusema:

“Ndaro ni mtu wangu wa karibu sana… na nampenda sana.”

Ujumbe wa Siku ya Kuzaliwa Uliofichua Mengi

Ukaribu wa wawili hao ulianza kuonekana wazi mnamo Juni 17, 2026, wakati Ndaro alipompongeza Rushayna siku yake ya kuzaliwa kupitia Instagram. Ndaro aliweka video zikimwonyesha wakiwa kwenye nyakati tofauti za furaha na kuandika:

“Moja ya watu wanaonipinga kuwa na matumizi mabaya ya fedha kila siku, wanaopigania furaha yangu ya kila siku. Wanamuita Rushayna ila mimi nakuita Rundaro. Happy Birthday to you Queen.”

Ujumbe huo uliibua hisia mbalimbali kutoka kwa mashabiki, wengi wakiamini huo ulikuwa uthibitisho wa wazi wa mahusiano yao.

Kutoka Yogo Beats, Haji Manara Hadi Ndaro

Safari ya mapenzi ya Rushayna imekuwa ikifuatiliwa kwa karibu na mashabiki wa burudani:

• Yogo Beats: Aliwahi kuwa kwenye mahusiano na mtayarishaji huyu maarufu wa muziki.

• Haji Manara: Walifunga ndoa rasmi mnamo Septemba 26, 2022, lakini ilivunjika na kupewa talaka mnamo Januari 2023.

Sasa, miaka mitatu baadaye, jina la Ndaro linatajwa kufungua ukurasa mpya katika maisha ya mapenzi ya Rushayna, huku mashabiki wakisubiri kuona kama wawili hao watarasimisha mahusiano yao hivi karibuni.