Rashford, Guimaraes, Diomande Watikisa Ulaya!
Dirisha la usajili barani Ulaya limezidi kupata moto huku vilabu mbalimbali vikipambana kukamilisha usajili wa nyota wanaowazawadia matokeo uwanjani. Hizi hapa ndizo taarifa kuu na za hivi karibuni za usajili zinazobamba zaidi:
Marcus Rashford
Klabu ya Fenerbahce ya Uturuki ipo tayari kutumia fedha nyingi kumshawishi mshambuliaji wa Manchester United na timu ya taifa ya England, Marcus Rashford (28), kujiunga nayo msimu huu wa kiangazi.
Rashford, ambaye msimu uliopita alionyesha kiwango bora akiwa Barcelona kwa mkopo, amerejea Manchester United huku akisikilizia ofa kutoka kwa miamba mingine ya Ulaya. Hii inafuatia hatua ya Barca kugoma kulipa Pauni 35 milioni zilizowekwa kama kipengele cha kumnunua jumla. Licha ya Bayern Munich na Atletico Madrid kuonyesha nia awali, kocha mpya wa Man United, Michael Carrick, amemhakikishia Rashford kuwa bado yumo kwenye mipango yake ya msimu ujao.
Yan Diomande
Winga wa kimataifa wa Ivory Coast mwenye umri wa miaka 19, Yan Diomande, hatajiunga na kambi ya maandalizi ya msimu mpya ya RB Leipzig. Hatua hii inajiri huku RB Leipzig ikishikilia msimamo wa kulipwa ada ya usajili ya Pauni 111 milioni kutoka kwa Real Madrid, ambayo imeweka nia ya dhati kumsajili ili kurejesha ubingwa wa LaLiga na Klabu Bingwa Barani Ulaya.
Bruno Guimaraes
Arsenal imehuisha upya mazungumzo na Newcastle United ili kumnasa kiungo wa kimataifa wa Brazil, Bruno Guimaraes (28). Washika bunduki hao wa London wanatarajia kutoa ada ya kati ya Pauni 70 na 80 milioni, ingawa mazungumzo yamekuwa na ugumu kutokana na miundo ya kifedha ya makubaliano hayo.
Ferran Torres
Miamba ya Ufaransa, Paris Saint-Germain (PSG), imeongeza kasi ya kumsajili mshambuliaji wa Barcelona na Hispania, Ferran Torres (26). Torres anadaiwa kuonyesha nia ya kuondoka Camp Nou ili kujiunga na timu itakayompa nafasi ya kuanza mara kwa mara kikosini.
Cody Gakpo
Liverpool imeweka wazi kuwa haina mpango wa kumuuza mshambuliaji wake wa Uholanzi, Cody Gakpo (27), licha ya Tottenham Hotspur kuonyesha nia ya kumsajili. Ingawa Gakpo mwenyewe anatamani kubaki Anfield, Liverpool ipo tayari kusikiliza ofa zitakazowasilishwa.
Wilson Isidor
Sunderland imegoma kumuuza mshambuliaji raia wa Haiti, Wilson Isidor (25), msimu huu wa kiangazi licha ya West Ham United kuonyesha nia. Isidor anatafuta timu itakayomhakikishia namba kikosini baada ya kusugua benchi kwa muda mrefu msimu uliopita.
Marc-Andre ter Stegen
Golikipa wa Barcelona na Ujerumani, Marc-Andre ter Stegen (34), yupo mbioni kujiunga na Ajax ya Uholanzi kwa mkopo wa mwaka mmoja. Ter Stegen, ambaye msimu uliopita alicheza Girona kwa mkopo, anafikiria kuondoka Barcelona mazima huku Girona pia ikipambana kumbakiza.
Marc Bernal
Aston Villa inajiandaa kuwasilisha ofa ya Pauni 30 milioni kwa ajili ya kiungo chipukizi wa Barcelona, Marc Bernal (19). Hata hivyo, Bernal ameuomba uongozi wa Barca usimuuze ili abaki kupigania namba kikosini msimu ujao.
Endrick
Mshambuliaji wa Real Madrid, Endrick (20), ameingia kwenye rada za AS Roma ya Italia, huku Lyon ya Ufaransa ikitaka kumrejesha kikosini. Hata hivyo, wawakilishi wa mchezaji huyo wanapendelea abaki Real Madrid ili kuendeleza kiwango chake.
Mykhailo Mudryk
Coventry City, iliyopanda Ligi Kuu England hivi karibuni, ni miongoni mwa klabu tatu za EPL zinazowania saini ya winga wa Chelsea na Ukraine, Mykhailo Mudryk (25). Mudryk anawaniwa baada ya kufanikiwa kushinda kesi iliyokuwa ikimkabili ya tuhuma za matumizi ya dawa zilizopigwa marufuku michezoni.
