George Mpole Aweka Wazi Mipango Yake Mashujaa FC, Ahadi Mabao Zaidi

Mshambuliaji mpya wa Mashujaa FC, George Mpole, ameanza rasmi maandalizi ya msimu kwa kuweka wazi nia yake ya kuonyesha kiwango cha juu na kuisaidia timu hiyo kufanya vizuri zaidi. Mpole amesaini mkataba wa mwaka mmoja kujiunga na klabu hiyo akitokea Tanzania Prisons.

Mshambuliaji huyo aliyewahi kutwaa kiatu cha ufungaji bora wa Ligi Kuu Bara msimu wa 2022/2023 akiwa na Geita Gold, amesema lengo lake kuu ni kuvuka idadi ya mabao saba aliyofunga msimu uliopita. Anafahamu wazi kuwa Mashujaa ilikuwa na changamoto ya ufungaji baada ya kumaliza msimu uliopita ikiwa na mabao 15 pekee, hivyo anataka kuwa suluhisho la safu ya ushambuliaji.

Akizungumza kuhusu usajili wake, Mpole alieleza kuwa viongozi wa Mashujaa walimtafuta muda mfupi kabla ya kufungwa kwa dirisha la usajili. Ingawa alikuwa na ofa mbalimbali ikiwemo kutoka klabu za nje ya nchi, aliona kuichezea Mashujaa ndio uamuzi sahihi kwa wakati huu.

Anatambua uwepo wa ushindani mkubwa katika ligi, lakini analichukulia hilo kama chachu ya kumfanya apambane zaidi. Mpole ana uzoefu wa kutosha ndani na nje ya nchi baada ya kuzitumikia klabu za FC Lupopo ya DR Congo, Pamba Jiji, pamoja na Tanzania Prisons.